Thiah ki nongpang haka um slap haka Umkiang PHC

Syllad | The Rising MeghalayaJuly 20, 2020

Ki nongpang kiba thiah pang ha Umkiang PHC kila hap ban thiah haka um slap kaba jaw na ka tnum iing namar ba la julor bad pei lut ka tnum iing jong kane ka jaka sumar.

Ki nongialam shnong jong ka Umkiang hadien ba kila ioh ka jingujor na ki nongthiah pang bad ki nongshim dawai mynta ka sngi kila leit ban jurip iaka Umkiang PHC. Haka jingjurip jong ki, kila lap ba ki tnum ka Umkiang PHC kila pei lut bad ka um slap kala jaw sha ki jaka thiah jong ki nongpang, kaba buh jingeh iaki longkmie kiba kha ba pun ha kane ka jaka sumar.

Ki nongialam shnong haka jingialam u Waheh Shnong ba Lasting Pala bad u Secretary Shnong Nicholas Lyngdoh kila lap ba kane ka PHC ka donkam ban marmot kyrkieh namar ba kala julor bad bam rang lut ka tnum iing.

Wat ki Doctor ruh ki mad ka juh ka jingeh kaba ka jaka treikam jong ki ruh ka jaw umslap nalor ka tnum kaba la jot la pei.

Kane ka PHC ka dei kaba tang maka kaba don sha ka thain Umkiang bad ka peit bun tylli ki shnong ha Elaka Narpuh naduh Hingaria Huroi shaduh Ratacherra.

Ki nongialam shnong ka Umkiang kila dawa na ka tnad ka koit ka khiah ban maramot mar mar ia kane ka jaka sumar khnang ba ki nongpang bad ki doktor kin lait na ka jing jhieh haka um slap.