Thma pyrshah Drok: Shi bnai ai por ka HYC ia ka Sorkar ban pyntreikam ia ki hynniew ki mat jingdawa

Syllad | The Rising MeghalayaNovember 8, 2024

Ka Seng Hynniewtrep Youth Council (HYC) ha ka 7 tarik u Naiwieng ka la ai por 30 sngi ia ka Sorkar Jylla ba kan pynurlong ia ki hynniew tylli ki mat jingdawa jong ka Seng kaba kynthup ia ka jingpyntreikam pura ia ka Tnad Anti Narcotic Task Force (ANTF) kaba laitluid bad ka kynhun pulit kaba aiti lut ha ka jingiakhun pyrshah ia ki kam khaii drok bad lada kane kam urlong ka Seng ka pynlong da ka jingleit tur paidbah shapoh Secretariat.

Hadien ka jingkren ha ka jingialang paidbah shibynta jong ka jingialap pyrshah drok hapoh Motphran hapdeng ka jingpyrkhing pahara jong ki pulit, u president ka HYC u Bah Roykupar Synrem u la ong,” Ngi la rai ban ai por 30 sngi ia ka Sorkar Jylla ba kan shim ia ki sienjam ban pyntreikam ia ki hynniew tylli ki mat jingdawa kaba kynthup halor ka jingthaw ia ka kynhun pulit ba kyrpang ne ANTF bad ban pynsted ban thaw ia ki fast track court.

“Lada ka Sorkar kam lah ban pynurlong ia kine ki jingdawa ka HYC kan ym pynlong shuh ia kino kino ki jingialang hynrei kan weng ia ki nongshong shnong ka Jylla ban leit tur beit shapoh Secretariat ban pynpaw pyrshah ia ka Sorkar Jylla namar ka jingbym shimkhia halor kane ka mat,” u la ong.

Katkum ka jingong ka jong u, na ka liang ka Sorkar la bunsien ka long kaba kloi ban ai ka jingpynthikna lyngba ki jingthoh hynrei ka la bteng ban shim por ban pyntreikam ia kane ka jingdawa.

Ia kane ka rai ka Seng ka la shim hadien ba ka Sorkar Jylla ka la ai ka jingpynthikna lyngba ka jingthoh ban weng ia ki jingeh kiba la rah da ka seng HYC hadien ka jingiakynaduh jong ka ia u Myntri ka Tnad Social Welfare u Bah Paul Lyngdoh.

“Hapdeng ka jingpynlong ia ki jingialang paidbah, ngi la ioh pdiang ia ka shithi na ka Sorkar Jylla lyngba u Myntri ka Tnad Social Welfare kaba pyntip ba ka dang shim ia ki sienjam kiba donkam halor ki jingdawa jong ka HYC. Ka shithi ka pyntip ba ka jingialang jong ka DRAM yn sa pynlong hapoh ka jingpyniaid jong u Symbud Myntri Rangbah ka Jylla uba khmih ia ka Tnad Home (Police) ha ka 14 tarik u Naiwieng,” ong u Bah Roykupar Synrem.

Ka Sorkar lyngba ka shithi ka la kular ruh ba kan shim ia ki rai kiba donkam ha katei ka jingialang ka ban wan na ka bynta ban thaw ia ka Tnad ANTF kum la ka jong ka kynhun pulit ba kyrpang ka ban iakhun ia ki jingeh halor u drok kumba la dawa da ka seng HYC bad na ka bynta ban thaw ia ki fast track court,” u la bynrap.

Kiwei pat ki jingdawa ki kynthup ia ki jaka sumar bad jaka iasyllok, ka jingdonkam ban pynbun ia ki jaka sumar bad ka jingdon jong kum kine ki jaka iasyllok, ka jingpynkhuid ia ki jingpang kaba khlem donkam jingsiew, ki OST bad day care centre, ka jingtohkit bad jingpynngat ia ki mukotduma katkum ka ain NDPS Act, ka jingkhanglad ia ka jingkhaii beain jong ka ain PITNDPS, 1988, ka jingpynkhlain ia ka buit ban pynduna ia ka jingpynpoi drok bad ka jingbuh ia ka ophis jong ka narcotic control board (NCB) ha Shillong.