Thmu ieh iaka metiap ki 6 ngut hapoh krem ban burieh iaka jingtih dewiong beaiñ, phet rieh u sardar

Syllad | The Rising MeghalayaJanuary 22, 2021

Kiba bun ki paidbah kila kynthoh tyngeh iaka jingjia halor ka jia iap krem dewiong jong ki 6 ngut ki nong Assam ha East Jaintia Hills District haka sngi Palei.

Ki paidbah kumjuh ki sengbhalang kila kynthoh iaka sorkar MDA kumjuh ia u Conrad K Sangma, Myntri Rangbah ka Jylla, u James Sangma Myntri Sorkar bad ia u Deputy CM u Prestone Tynsong da kaba ong “Phi lah ban thok katto katne sien ia ki katto katne ngut ki briew, hynrei phim lah ban shukor ia baroh ki briew ha baroh ki por.”

Kila ong ia kane hadien bala jia ka jingiap jong ki 6 ngut ki nong Assam ha Sarkari hajan ka shnong Dienshalalu bad Rymbai.

Kine ki 6 ngut ki lanot aksident ha krem dewiong ki dei u Jilal Uddin (25) na Jalabad, Karimganj, Dilwar Hussain (35), Ali Hussain (40) bad Mokbul Hussain kiba dei shipara na Karimganj, Abdul Sabur (32) na Laborputa, Silchar, Cachar District. Uwei pat haduh bala thoh iaka khubor ym pat lah ban pynthikna iaka kyrteng jong u.

Ka jingiap hapoh krem dewiong hapoh ka Jylla kam dei shuh kaba phylla, hynrei kane ka sien kadei kaba sngew par niangkhriat ha kaba la shu mut ban ieh syndon iaka metiap jong ki 6 ngut nongtih dewiong kiba la shah ban hadien ka jingdkut ka synduk tan dewiong.

Kane ka jingjia aksident ha krem dewiong kaba la shim noh iaka jingim jong ki 6 ngut ki nong Assam kiba na Karimganj kiba hap haka Ratabari Police Station, Karimganj.

Kane ka jingjia kala jia haka por 12 baje mynsngi haka 21 tarik une u bnai.

U Sultan Hussain u ba haïing jong ki lanot hap krem dewiong ula ong ba marsien jia kane ka jingjia u sirdar ne u nongpeit iaka jingtih deiwong ula phet rieh ialade. Katba ki trai jong kane ka par dewiong pat “Kila ong iehnoh iaka metiap shapoh krem dewiong da kaba ong ruh ba ki dei nong Bangladesh suda bad,” la kynnoh u Sultan Hussain, uba la iam kthang haba kren bad ki nongthoh khubor ha Khliehriat.

Shuh shuh u Sultan ula ong “Ngi la ioh jingtip halor kane ka jingjia na ki paralok ba iatreibylla bad wat hadien ba ngi pan jingiarap ym don ba iarap dei hadien bala tip ki Pulit bad u DC kiba la iadonlang baroh shimiet sha katei ka jaka ba ngi la ioh jingiarap.”

“Namar ka jingduk ngi wan trei bylla ban tih dewiong sha Meghalaya,” la ong u Sultan uba ap iaka metiap bad kiwei pat kiba haiing jong kine kiba la khlad ha Khliehriat CHC.

U Azim Uddin pat ula ong ba u don u bahaiing jong u uba la iap ha kane ka jingjia. Ula iathuh ba kane ka kam tih dewiong kala iaid la shibnai bad marsien tip ia kane ka jingjia ula wan

Haduh bala thoh iaka khubor ka metiap kine ki briew ka dang don ha Khliehriat CHC ban pyndep iaka jingdonkam ka aiñ bad ka post mortem

U DC East Jaintia Hills u Bah E Kharmalki ula ong ba la mudui da ka jingujor ejahar pyrshah ia u/ka trai par bad ka jingtohkit kala iaid shakhmat.

“Ka District Disaster Management Office (DDMO) ryngkat bad ki sahep jong ka State Disaster Response Force (SDRF) kila pynlong ka jingtohkit ha katei ka par dewiong bad la pynthikna ruh ba ym don metiap shuh lait na kitei ki 6 ngut,” ong ka khubor na u GK Iangrai, Assistant Inspector General of Police (A), Shillong.