Thmu ka Sorkar jylla ban pynlong compulsory ia ka subject Mathematics ha ki skul

Syllad | The Rising MeghalayaOctober 27, 2023

U Myntri ka Tnat Pule Puthi u Rakkam A Sangma haka 27 tarik Risaw ula pyntip ba na ka liang ka Sorkar jylla shen kan sa shim ia ka rai la kan pdiang ne em ia ka sienjam ban pynlong  ia ka Mathematics kum ka compulsory subject hapoh ki skul.

Haba kren sha ki lad pathai khubor khubor une u Myntri ula ong ba ki la pynlong ia ka jingialang bad ki principal na palat 30-40 tylli ki secondary bad higher secondary school na ka bynta ban iatai sani ha kaba iadei bad kane ka phang.

U la ong kiba bun na ki principal ki la pynpaw ka jingsngewkhia ha kaba iadei bad ki jingmih na ka jingai jinghikai ha kaba ki la ai jingmut ruh ba dei ban pynkylla noh ia ki katto katne ki kot skul khnang ba kin long kiba mar ia ryngkat bad ka national standard.

Nalor kata u la ong ruh ba kiba bun ki la pynpaw ba dei ban pynlong noh ia ka Mathematics kum ka compulsory subject, hynrei ia mynta hi na ka liang ka sorkar kan sa shong pyrkhat ia ki jingai jingmut jong ki Principal. “Nga ruh ha ka jingsngew shimet nga sngew ba bun ki Academicians bad ki Principal kila ai jingmut ba ia ka Mathematic ym dei shuh ban pynlong kum ka Optional Paper…ia mynta ka dei ka “Best of Five” na ki 6 tylli ki subject. Kumta ka sorkar kan sa shim ia ka rai hadien ba kala dep ban khmih bniah bha” ong u Myntri.

Ha ka juh ka por une u Myntri ula ong ba haduh 90% na ki khynnah pule kin ym shim satia ia ka subject mathematics lada ki iohlad. “Lada ngi ailad baroh kin kwah ban don ha ka jaka kaba suk. Ha Nga hi shimet lada ngi ailad ba ka Mathematics kan dei ka Optional Paper, bun ki khynnah kin ym shim ia kane ka subject, kane kan long kaba la thikna hynrei mynta ha kane ka juk kaba leit pule ha ki kyrdan kiba heh khlem ka mathematics kan long kaei kaei ka bym lah ban pdiang hynrei nga tharai ba ngin lah ban pynkhreh bha, ngi don ia kajuh ka jabieng bad kiwei pat kiba don ha kane ka sla pyrthei bad nga tharai kala poi ka por ba ngin khmih bniah bad ban shim ia ka rai” ong shuh shuh u Myntri.

Nalor kata u pyntip ruh ba ka tnat ka la bthah ia ka Directorate of Educational Research and Training (DERT) ban leh ia ka jingwad bniah halor ka jingleh bha ki khynnah pule hashwa ban pynlong ia ka subject Mathematics kum ka Optional Paper.

Shuh shuh u la ong ruh; “Ngi kwah ban tip haduh katno ngut ki khynnah kila leh bha ha ka mathematics (shwa ban pynlong ia ka kum ka Optional Paper) bad katno ngut ki khynnah kiba la kiar ban  shim ia ka subject mathematics. Ngin sa ioh ia ki jingtip bad ki jingkhein baroh, bad ngi la kyrpad ia ka Meghalaya Board of School Education (MBOSE) bad ka DERT ba kan ai ha ngi  ia ki jingtip khnang ba ngin ioh ia ki jingtip kiba pura bad ban sngewthuh khambha halor kane ka mat.”