Thmu pynpra ka sorkar iaka Tirot Sing Indoor Stadium phah sangeh ki nongkitkam MSBA bad ki nongialehkai

Syllad | The Rising MeghalayaFebruary 26, 2022

Ki nongkit kam ryngkat ki khynnah ialehkai iaka Badminton bad kumjuh ia ka table tennis, kiba juh im sngi miet la bat sngi, ban ia kilan ne ialehkai ha U Tirot Sing Indoor Stadium, Lower Lachumiere, ki la wan shakhmat lyngba ki lad pathai khubor, ban kyntu ia ka sorkar jylla, khamtam ia ka tnat Sports & Youth Affairs, ba ia mynta kan sangeh shwa ia ka jingthmu ban pynpra noh ia kane kawei na ki jaka ialehkai kaba la rim bad ba don nam tam jong ka nongbah ne wat ha ka jylla.

Kane ka jingwan mih shakhmat ki nongkit kam bad ki khynnah ialehkai lem bad ki kmie ki kpa, ka jia long hadien ba ki la ioh jingtip ba na ka liang ka tnat Sports Department, ka la thmu ban shim ia ka sien jam ba kan pynpra noh ia kane ka jaka ialehkai, da kaba khreh ban tei noh pat da ki iing ophis treikam jong ka sorkar jylla.

Pule | Sdang biang ka jingiakhih ka MUPSTA ban dawa kyntiew kyrdan deficit iaki skul adhoc

Khyndiat shaphang kane ka jaka ialehkai, la juh tip bad bna ia ka kum ka National State Council of Assam, ia kaba la plie nyngkong eh ia ka da u President barim jong ka ri India u Dr Fakrudin Ali Ahmed ha u snem 1964, kaba hadien ba la seng nyngkong ia ka, la juh pynlong ia ki iakob ialehkai naka bynta ka ri lum Khasi-Jaintia, ia kaba ka jingthmu ba kyrpang ha kaban tie ia kane ka jaka ialehkai, ka long ban kyntiew ia ka jingialehkai jong ka badminton.

Hadien ba ka jylla kala ioh ia la ka jong ka jylla kaba pura, la iai bteng wat ban maramot ia ka haduh arsien arwat katta ha u snem 1984-86, bad ha u snem 1992, la shim shuh shuh ia ka sien jam ban tei pynthymmai biang ia ka sa shisien.

Nangne hi shakhmat ki snem ki la nang iaid, bad ha manla ki khep, la lah ha kaban pynlong ia kiba bun bah ki lympung ialehkai, kaba ym kut shuh tang naka bynta jong kiane ka jylla, pynban wat ia ki lympung ialehkai, kiba dei jong ka ri kum ka Inter Table Tennis Zonal Championship u snem 1995, Junior national TT C’ ship, haba phai sha ka badminton, la kuh pynlong ruh ia ka lympungialehkai jong ka AG Meet.

Dei na kane ka jaka ialehkai ba kiba bun ki rang bad ki thei ialehkai badminton bad table tennis ki la wan ban mih paw bad tyngshain bna ka bynta ka jylla katno tam lei lei haba ki leit ban iakhun shabar.

Pule | Ïakynduh ka kynhun ki nongïalam niam ia u Lat ka jylla halor ka jingshah lehbeiñ ki Khristan

Ki nongkren  ba kham pawkhmat ha kane ka jingiakynduh bad ki lad pathai khubor, ka kynthup ia Dr CO Rangad Sr vice president, Meghalaya State Badminton Association, Rev Kyrsoibor pyrtuh, executive member EKHDBA, Rajesh Kamal, Secretary MSBA, bad don lang ruh kong Pandora Rapsang, President EKHDBA, bah P. Laloo vice president MSBA, Goldenstar Kharbuli vice president EKHDBA, bah Michael bad u bah H Passah.

Haba kylli kaei ka sien jam ba kin shim lad aka sorkar kam sngap, na ka liang ki nongkren, ki pynpaw ba ia mynta, kin iaid shwa da ka lynti ban shu pynsngew paidbah ia kaneka jingkyrpad ka jong ki, hynrei lada ka sorkar kam sngap ne leh eiei, kin sa shong da ka jingialang naka bynta ban shim ia ki rai halor kane.

Ka daw kaba pynlong ia ki nongkitkam bad nongialehkai ban pyrshah ia kane ka jingthmu jong ka sorkar ka jia long ba kumba ka long ia mynta, hadien ba la sdang ban kham hiar jong ka jiungpang iabit u khniang jingpang Covid 19, kiba bun na ki khynnah ialehkai, ki la thrang bad sliang dik dik ka mynsiem ban ioh ban leit ban kilan tista sha kum kine ki jaka ialehkai, kaba lehse wat laa ka tnat sports ka don mynta sa kawei ka indoor stadium ha JN Stadium, hynrei ha kiba un hi ki khep, kane ka jaka bunsien kam juh lait namar ba don ki khep ba hap ban pynshong noh ia ki bor pahara ha lada jia ba don ka huri hura ha sor, ne don ruh pat ki khep ba la khangdam syndon ia ka, namar ba pyndon ha kaban buh ia ki kor ki bor ne ki tiar ki tar jong ka tnat election.