Thok shukor ki karkhana dewbilat iaka JHTOA, pynbna syndon da ka jingiakhih paidbah

Syllad | The Rising MeghalayaSeptember 21, 2023

Ka Jaintia Hills Trucks Owner’s Association (JHTOA) hadien ba kala shah thok shah shukor ha ki karkhana pynmih dewbilat haka kit ka bah dewbilat ne transport kala rai ban pynlong da ka jingiakhih paidbah pyrshah iaki karkhana nadun 5 tarik Risaw khlem buh por.

Ia kane ka rai la shim haka general meeting kaba la long ha Tahkhniang Tuber haka 19 tarik une bnai Nailur. Ka JHTOA kala shim ia kane ka sienjam namar ba ki karkhana dewbilat kim shym la bud ryntih iaka jingiakut ka JHTOA bad  ka synjuk ki karkhana ka Jaintia Hills Cement Manufacturing Association (JHCMA).

U Biangshwa Shylla president ka JHTOA, ula ong baroh ki karkhana dewbilat kiba mih na Lumshnong, Thangskai bad Wahiajer kim shym la bud ryntih iaka jingiakut ha kaba iadei bad ka rukom kit mar kata ka dewbilat bad ka dew clinker.

Ula ong baka JHTOA kam banse ban shim iaka rai ban iakhih paidbah namar ka jingleh khliehshrieh kine ki karkhana dewbilat bad pynduh lad iaki trai trok trai ri trai muluk ban ioh kamai naka kit ka bah.

Ula pynkynmaw ruh ba JHTOA ha ki 2 snem baladep, ka la pynlong ia kiba bun ki jingiakhih pyrshah iaki karkhana bad na ka liang ka sorkar MDA ruh ka la pynmih iaka notification jong ka bai kit bai bah kaba long 7 tyngka shi kilometre.

Ha ka jingialang bad u DC ka East Jaintia Hills ruh la mynjur ban ai ban kit ban bah ki trok hapoh ka lama ka JHTOA kumba 60 tylli haka shi sngi, hynrei ki ioh tang kumba 15 tylli ki trok haka shi sngi

Kumta ka JHTOA kala shim iaka sienjam bad rai ban iaid shakhmat ban iakhih paidbah bad khang iaka kit ka bah ki trok dewbilat.