Thombor Shiwat kum u CEM JHADC lai sien lai wat

Syllad | The Rising MeghalayaFebruary 28, 2025

Ka long lehse ka sien kaba nyngkong eh ha ka histori jong ka Jaintia Hills Autonomous District Council (JHADC) ba u juh u MDC na ka kajuh Constituency un bteng ban bat ia u lakam synshar jong ka District Council hadien bala dep pynlong ia ka elekshon sha ka iing dorbar thawain jong ka JHADC.

Kane ka urlong hadien ba u MDC jong ka National People Party na ka Moodop Umladang Constituency u Ma Thombor Shiwat u la shah jied ban shimti biang ia ka shuki Chief Executive Member jong ka Jaintia Hills Autonomous District Council ha ka kynti kaba lai da kaba pynrem ia u MDC jong ka Indian National Congress (INC) na Amwi Khliehtyrchi Constituency u Ma Madonbai Rymbai katba ki MDC jong ka Voice of the People Party (VPP) ki la kyntait ban iashim bynta ha katei ka eleshon.

Ia kane ka elekshon jong ka shuki Chief Executive Member la pyniaid da u Chairman jong ka JHADC u Dr. Sankey Shangpung ha ka 28 tarik Rymphang haba ka NPP ha ka ryngkat ka jingkyrshan jong ka UDP bad uwei u MDC shimet ki la pynieng ia u Ma Thombor Shiwat kum u kyrtong jong ki, katba ka Seng Congress pat ka la pynieng ia u Ma Madonbai kum u kyrtong jong ki.

Haba la niew iaka iaki vote baroh, u Ma Thombor Shiwat ula ioh ka vote jong baroh ki MDC ka NPP, UDP bad u MDC shimet kaba long 17 vote katba u Ma Madonbai u la ioh 3 vote jong ki MDC ka Congress.