Thud internet suki ka jingpynrung kyrteng MHIS ha Jowai Civil Hospital

Syllad | The Rising MeghalayaSeptember 25, 2019

JOWAI: Ka Jowai Civil Hospital, Ialong kaba dei tang maka na ki aspatal sorkar kaba ai jingsumar ïa baroh ki nongpang kiba wan na kylleng ki CHC, PHC ha Rilum Jaiñtia kala takhuh jingeh ban pynrung kyrteng ïaki paidbah nongpang hapoh jong ka Megha Health Insurance Scheme (MHIS) – Phase IV ban ïoh jingïarap pisa haba pang ba shitom namar ba ka thud ka internet. 

“Naki 9000 ngut ki briew kiba thiah pang ha Civil Hospital Ialong mynta u snem 2250 ngut ladep pynrung kyrteng tang haka Jowai Hospital,” la ong u Dr. KN Lamare  bad ula bynrap ba kane ka suki ka jingpynrung kyrteng haka MHIS namar ba duna ne tlot ka internet.

“Ka jingpynrung kyrteng hapoh ka MHIS kaba hap ban leh online lyngba ka internet ka suki bha ha Jowai Civil Hospital, Ialong namar ka jingthud ka internet kaba la bankhia ïaki nongtrei ba kin pyndep ïaka jingpynrung kyrteng haka por kaba biang,” la ong u Dr. KN Lamare.

Ïa kane u Dr. Lamare ula ong haba kren haka jingrakhe dap shisnem ka Ayushman Bharat ka skhim ban ïarap pisa ïaki nongshong shnong ka ri ban ïoh jngsumar ba paka ha ki jaka sumar ha phyllaw jong ka Jowai Civil Hospital, Ialong haka sngi Nyngkong.

U Dr. Lamare ula ong wat la thud ka jingpynrung kyrteng, hynrei ka aspatal ka pyrshang katba lah ei ban pynbiang ki lad jingïarap ïa baroh ki nongpang kiba ym pat dep ban pynrung kyrteng ruh.

“Kane ka jingthud ka internet ha Rilum Jaiñtia ka kynthup East bad West Jaiñtia Hills District bad ki nongpang na kylleng ki jaka sumar kila kila hap ban wan thiah ha Jowai Civil Hospital na ka bynta ka jingpang jingshitom kaba malu mala ban ïoh pyndonkam ïaki smart card,” la ong shuh shuh u Dr. Lamare.

U Doktor Lamare ula ong “Lada ka internet ka biang kam don jingeh ïaki nongtrei ban pynsted ïaka jing pynrung kyrteng hapoh ka MHIS Phase IV.”

Ka Ayushman Bharat (Healthy India) kaba la tip kum ka Pradhan Mantri Jan Arogya Yojana (AB-PMJAY) kadei ka skhim sorkar kmie ba sdang naduh u snem 2018 ban iarap kyrshan pisa T.5 lak kawei ka longing sha ki paidbah ha ka liang ka koit ka khiah. Kane ka skhim ka kynthup ïaka Health and Wellness Centre.

Kiwei kiwei ki jingeh kane ka hospital ka ïakynduh kadei ka jingbun ki nongpang bad ki hap ban thiah ha madan baroh shisnem lynter. Kane ka hosipital kadon 100 jingthiah, hynrei kiba thiah pang kim duna 150 ngut man ka sngi.

Ka don tang 15 ngut ki doctor 39 ngut ki nurse kynthup ïaki 14 ngut kiba trei Contract. 5 ngut ki Doktor kumjuh ki Nurses kila shah pynkynriah kam hynrei kane ka jaka jong ki ka dang sah thylli haduh mynta kaba ki doctor kane ka aspatal ki shem jingeh bha pynbiang ka jingshakri akba pura ïa u nongpang.