Thud ka jingshakri ka Jio ha kylleng ka Rilum Jaintia

Syllad | The Rising MeghalayaJanuary 29, 2021

Ka jingai jngshakri ka Jio company ia ki paidbah pyndonkam mobile phone bad internet kala thud ha baroh kawei ka Rilum Jaintia bad bunsien ki paidbah kila sakhi iaka jingthud ka network bad kim ioh ban pyndonkam hok iaka phone kumjuh ka internet.

“Ka jingtreikam jong u Jio ha khappud kum haka shnong ka Khanduli, Lapangap bad kiwei kiwei ki shnong khappud kam long kaba iaid beit iaid ryntih katkum ka jingangnud u paidbah jong katei ka thain. Ka jingwan ka Jio kala kylla long ka jingkyrkhu kaba khraw shisien ka sngi, hynrei ka jingthud ka treikam ka long pynban ka jingtim kaba khraw na ka bynta u paidbah ba shaniah iaka jingshakri ka (Jio),” la ong u Tynshain Krem president KSU Khanduli Umshangiar Unit.

Ka jingthud ka jingai jingshakri ka Jio kala jia ha Jowai bad kiwei kiwei ki shnong ruh bad bun ki paidbah kila ud namar ba kim ioh ban pyndonkam hok ban iakren phone kumjuh ban pyndonkam iaka internet. 

Ka Khasi Students Union, Khanduli-Umshangiar Unit, haka 27th Kyllalyngkot, 2021, hapoh ka jingialam u President ka Unit Tynshain Krem ryngkat ka jing ia synranlang u Saikial Sumer (Secretary ka KSU Lapangap Unit) ki la leit ban ia kynduh ia u Manager ba dei peit ia ka Jio telecom ban kyrpad bad dawa na u ban pynbiang network ha baroh 24 kynta khnang ban pynsuk ia u paidbah haki thain khappud.