Thud shakri ka Meghalaya Rural Bank, dawa ka KSU Khanduli ban pynbha

Syllad | The Rising MeghalayaMay 20, 2021

Ka Meghalaya Rural Bank, Khanduli Branch kala thud haka rukom ai jingshakri ia u paidbah ha ka thain khappud bad kiba bun kila pynpaw ba ki shem jingeh namar ka jingdkoh ka bank.

Ka Khasi Students Union (KSU) Khanduli-Umshangiar Unit hadien ba kala ioh iaka jingujor na ki paid nongshong kala iakynduh ia u Branch Manager haka sngi Balang.

Ha kane ka jingiakynduh bad u Branch Manager, ka KSU kala dawa ban pynbha iaka jingshakri jong ka bank sha u paidbah kata naduh ban pynbiang iaki Machine update passbook, jingwan slem ki nongtrei ka bank bad ka jingtuh iaka por u paidbah haka por bam bad dih sha sngi, kaba la ktah ia u paidbah ba hap ban iaid rwiang ha ki lynti ba jngai ha kiba bun tylli ki shong.

U Branch Manager u kubur ba ka don ka jingthud haka jingai jingshakri ka bank bad ula ong ba un shimkhia ban pynbha bad pynbeit ia ki jingdonkam jong u paidbah, la ong ka KSU Khanduli Umshangiar haka jingleit iakynduh ia u manager ka bank kaba la iadonlang ruh ki nongialam ka Nartiang Circle.