Thung dieng ki heh FCI Shillong ha ka jingrakhe ia ka Rashtriya Poshan Maah

Syllad | The Rising MeghalayaSeptember 8, 2021

Ka Food Corporation of India (FCI), Divisional Office Shillong ha ka 04 tarik u Nailur, 2021 ka la pynlong ia ka prokram thung dieng kum shi bynta ka jingrakhe ba shi bnai lynter ia ka Rashtriya Poshan Maah ka la sdang naduh ka 1 tarik u Nailur, 2021 bad kan kut pat ha ka 30 tarik u Nailur, 2021.

Ha katei ka prokram ba lyngkot la wan ban ia donlang da u Paishuni Kumar, Executive Director (NE Zone), u G Kartikeyan, Dy General Manager (Gen) bad u Devesh Kumar Yadav, General Manager (R) lem kiwei ki ophisar ka FCI Shillong.

Ka jingrakhe ia ka Poshan Maah 2021 ka la iaid lynti ha ka Jylla bad ha u bnai Nailur la rakhe man u snem ban wanrah ka jingshai ha ki Jylla, ki district, ki Block bad ha ki shnong ki thaw ban wahrah ïakhun pyrshah ia ka jingduna ki jingbam ba tei (malnutrition) na ka bynta ki longkmie armet bad ki khynnah.

Ka Poshan Maah ka dei ka thong treikam ka Sorkar India naduh u snem 2018 ban rat dyngkhong ia ka jingduna ki jingbam ba tei na ka bynta ki longkmie armet kumjuh na ka bynta ki khyllung ki khynnah.

Ka jingrakhe ia ka Rashtriya Poshan Maah 2021 kan kynthup saw tylli ki phang na ka bynta 4 taïew- ka jingthung dieng ha ka dur ka Poshan Vatika ha ki jaka ba lait kum ki skul, ki shnong bad ki ophis lem kiwei ha ka taïew ba nyngkong.

Ha ka taïew ba ar kan pynleit jingmut na ka bynta ka Yoga bad AYUSH na ka bynta ki jingbam (ki jinghikai yoga na ka bynta ki longkmie armet, ki samla bad khynnah kynthei). Ha ka taïew ba lai pat kan don ka jingsam ia ki jingbam ba tei sha ki nongtrei Anganwadi bad ki tiar Information Education Communication (IEC).

Ha ka taïew ba saw kan don ka jingpynshai halor ka Severe Acute Malnutrition (SAM) bad ka jingsam ia ki jingbam batei sha kiba dei ban ïoh myntoi.

Hadien ka jingthung dieng, ki heh ophisar ka FCI ki la hiar ban jurip ia ka jaka buh khaw kaba don ha Mawlai ban peit ia ka jingbit jingbiang ki jaka buh bad u khaw ruh kumjuh na ka bynta ban sam.