Thung ka Sorkar da ki consultant ban wad surok thymmai ban lait na ka jingkieng Umiam

Syllad | The Rising MeghalayaAugust 21, 2024

U Myntri ka tnad Bording u AT Mondal ha ka 20 tarik Nailar u la pyntip ba na ka liang ka Sorkar Jylla ka la thung da ki nongai jingmut ne consultant na ka bynta ban wad da kawei pat ka lynti surok khnang ban pynthikna ba baroh ki jait kali kiba wan sha ka nongbah Shillong kin ym donkam ban iaid lyngba ka jingkieng Umiam.

Haba kren sha ki lad pathai khubor u Mondal u la ong ha kaba iadei bad ka ISBT ha Mawiong, kan donkam katto katne por ban ioh da kawei pat ka surok khnang ban lah ban  pynurlong ia ka jingthmu jong ka.

“Ka Sorkar ka la thung ia ki consultant kiba la shim ia ki sienjam ban wad da kawei pat ka lynti surok khnang ba baroh ki kali kin lah ban wan sha ka nongbah Shillong,” u la ong.

U Mondal u la ong ruh ba ka jingkylli kaba iadei bad ka jingweng noh ia ka jingpyrkhing ia ka leit ka wan jong ki kali kiba khia lyngba ka jingkieng Umiam kam don satia.

“Ka jingpyrkhing kan dang neh kham slem namar katba nang iaid ki sngi ki por ka jinglong jong ka jingkieng ruh kan nang tlot, kumta kumno phi khmih lynti ban weng noh ia kane ka jingpyrkhing ba la pynjari,” u la buh jingkylli.

“Katkum ki consultant ki la pynpaw ba dei ban khanglad ia ki kali kiba khia khia palat ia ka 9 MT ba kin iaid lyngba jong kane ka jingkieng..dei na kata ka daw ba ngi la pyntreikam ia kane ka jingpyrkhing,” u la ong.