Thung ka Sorkar ia u Administrator ban pynduh pyndam noh syndon ia ka CMJ University

Syllad | The Rising MeghalayaFebruary 21, 2025

Ka Sorkar Jylla ka la thung ia u Administrator u ban pyntreikam ia ka hukum na ka bynta ban pynduh pyndam noh syndon ia ka CMJ University.

Ka jingpynbna ba la pynmih da u Commissioner & Secretary ka Tnad Education, u Vijay Kumar Mantri ha ka 20 tarik Rymphang ka ong, “Haba pyntreikam ia ka hukum jong ka iingkashari Supreme Court kaba 13 tarik Rymphang 2025, bad katkum ka kyndon 48 jong ka CMJ university Act, 2009, u Lat ka Jylla u la thung ia u Bah D. Lyngdoh Joint Secretary ka sorkar Meghalaya ka Tnad Education kum u Administrator jong ka CMJ University Meghalaya.”

U dei ban pyntreikam ha kaba iadei bad ka jingpynduh pyndam noh ia ka University ha ka rukom ba la mynjur da ka sorkar Jylla.

Ha ka 14 tarik Rymphang, laingut ki heh ophisar lyngba ka jingbthah jong ka sorkar Jylla ki la leit jurip ia ka campus jong ka CMJ University kaba don ha Jorabat ban pynthikna halor ka jingshngain jong kane ka campus.

Kane ka kynhun kaba leit jurip ka la bthah ia ka University ban pynsangeh lut ia baroh ki bynta kiba iadei bad ki kam pisa pilain, ia ki jingtreikam bad ia ka jingpule bad ban pynthikna ban ym pynkynriah ia ki jingdon jingem napoh kane ka campus, kata kynthup ia ki file, computer, hard disk lane kino kino ki tiar.

Ia kane ka sienjam la shim hadien ka hukum ba la pynmih da ka iingkashari Supreme Court ha ka 13 tarik Rymphang kaba la hukum ban pynduh pyndam noh ia ka CMJ University ha Meghalaya, kata haba pynskhem ia ka jingshim rai ka sorkar Jylla ban khangdam noh ia kane ka skulbah ha u snem 2014 namar ka jingkynnoh kam shukor ia ki hajar ngut ki samla pule da kaba ai ia ki degree kiba shu thok.

Ka iingkashari ba hakhliehduh ka la pynksan ia ka hukum jong ka sorkarJylla da kaba kyntait ia ka jingbthah jong ka iingkashari Meghalaya High Court ha u snem 2021 ba kan pyrkhat ha kaba iadei bad ka jingkhangdam ia kane ka skulbah.