Thung kam pura ka Sorkar iaki palat 850 ki nongtrei Adhoc

Syllad | The Rising MeghalayaJanuary 11, 2025

Ka jingialang jong ka Kynhun Myntri ka Jylla kaba la long ha ka 10 tarik Kyllalyngkot ha Polo Orchid, Sohra kala mynjur ban thung kam pura (regularise) iaki palat 850 ki nongtrei Adhoc ha ki tnad sorkar bapher bapher.

Ia kane ka rai kaba la ap khmih lynti la kham slem la mynjur ha ka jingialang ka kynhun myntri kaba nyngkong jong une u snem ba la pyniaid da u Myntri Rangbah ka jylla u Conrad K Sangma ha Sohra.

Ha u snem 2002, ka sorkar ka la thungkam palat 3000 ngut ki nongtrei adhoc, kiba la thung shwa u snem 2007, katkum ka jingbthah jong ka iingbishar ba ha khlieh duh.

Hynrei u Sangma u la ong ba ki don shibun ki nongtrei Adhoc, kiba la thung shwa u snem 2007, ki bym shym la pynskhem ne duh lad ha u snem 2022.

“Ki dang don kumba 800 ne 850 ngut ki nongtrei adhoc, katkum ka thup…Kumta ka sorkar mynta ka sngi ka la rai ban pynbeit ryntih ïa ki jingthungkam jong ki. Mynta ka sorkar kala rai ban regularise iaki palat 850 ha kata ka thup (kiba palat 3000 ngut ki nongtrei adhoc), kiba la duhlad ha ka por ba ai jingmynjur da ka kynhun myntri,” u la bynrap.

Shuh shuh, u myntri rangbah u la pyntip ba kam don kano kano ka jingktah ha ka liang ka pisa tyngka ha kaba iadei bad ka tulop namar ba ia kine ki nongtrei la thung ha ka rukom adhoc katkum ki jingdon ki kam.

U la pynbna kine ki nongtrei kin ioh ia ka bai bam tymmen ha ki por ban wan bad mynta ki dei ki nongtrei kiba pura.