Thung tohkit magistor bad tohkit laitluid halor ka jinglaitphet bad shah pyniap 4 ngut ki koidi ka Jowai District Jail

Syllad | The Rising MeghalayaSeptember 13, 2022

Ka sorkar jylla ka la shim ia ka sien jam ba kan da thung noh da ka kynhun tohkit ban lam khmat da u Magistor bad ha ka juh ka por da thung wat ia ka jingtohkit kaba laitluid haba iadei bad ka jinglait phet ka jong ki 6 ngut ki koidi na Jowai District Jail kaba la bynrap da ka jingshah bom iap noh pat ki saw ngut ha ka kti jong ki paidbhur.

Haba wanrah iaka Suo Motu ne ka case kaba la shim hi ki pulit ha ka dorbar synrai ka iing dorbar thawian, u myntri kam pohiing u ma Lahkmen Rymbui  haka lah sngi u Blei, u pyntip hapoh ka iing ba u District Magistrate u la bthah ia u Additional District Magistrate u PK Boro ban shim iaka jingtohkit haba iadei bad  ka jinglaitphet ki 6 ngut ki koidi na kane ka phatok.

Haba iadei bd ka jingthung ia ka kynhun tohkit ba laitluid (independent inquiry) u ma Lahkmen u pyntip hapoh ka iing  bala bthah ia u Additional Superintendent of Police, West Jaintia hills District la pynkhamti ha u ban wad iaka daw tynrai halor ki daw bad kaei kaba lajia hadien ba kine ki 6 ngut ki koidi ki la lait phet na kane ka phatok.

Katba u M A Challam Additional District Magistrate la  bynshet ha u ban don bynta ha ka liang jong ka post mortem ia ka met iap jong kine ki koidi.

Ia kine ki rai baroh, ka sorkar ka la shim hadien ba saw na ki hynriew ngut ki koidi kiba la phet na ka phatok na Jowai, ki la shah bom shah tied haduh ba kin da khlad noh shi syndon ha kawei ka khlaw kaba hajan ka shnong Shangpung ha West Jaintia Hills District.

Kine ki saw ngut ki koidi kiba la phet rieh ha kane ka khlaw la ong ba ki la shah ker tawair ha u  hajar ngut u paidbah bym duna ia ka san hajar ngut, kiba kynthup lang na kiwei pat ki shnong ba marjan, kila kthong ia ki ha kaneka khlaw tad haduh ba kin da ioh ban bat bad ban sdang ka jingiabom iatied paidbah ia ki haduh ba kin da khlad.

U ma Lahkmen u iathuh ha ka iing, ba mar sein ioh jingki.tip, ki Pulit kila leit sha katei ka jaka ia kaba la ong ba la khanglad noh ia ki da u paidbah u bym lah shuh ban tehlakam ia  ki.

 “Ki Pulit ki la pyrshang ban kren bad pynsngewthuh ne ban tur sha u paidbah khnang ban ioh ban poi sha kane ka jak aba la don kine ki koidi khnang ban lah ban ioh pyllait im ia ki, pynban hapdeng ka jingpyrshang ki pulit la don pynban kiba la mynsaw”.

Hadien ka jingiai pyrshang, ba kyntang ia wai ki Pulit ki la ioh ban tam noh ia ka met iaka met kine ki saw ngut ki koidi ki bym tip briew shuh bad ban rah ia ki sha Civil Hospital hadien ba la ioh jingbit na u magistrate, pynban u la ong ba kat ban da poi ha hospital, ki doctor ki la pyntip ba kine baroh saw ngut ki la khlad, la batai kham bniah shuh shuh ua ma Lahkmen hapoh ka iing.

Kine ki saw ngut kiba la khlad  ki kynthup ia  I Love You Talang, Lodestar Tang, Shidorki Dkhar bad Marsanki Tariang (convict) na  Priang, katba ki arngut ki koidi kiba lalait na ki tyrsim jong u paidbhur ki long u Ramesh Dkhar bad  Rikmenlang Lamare.

Shuh shuh u ma Lahkmen u iathuh hapoh ka iing ba ka sorkar ia mynta ka la dep ba kan shim ruh ia ka sien jam ba kan weng kam noh shwa shipor tad haduh bala dep ka jingtohkit ia ki san ngut ki nongtrei jong kaneka phatok bad kine ki long u Rajesh Swer (head warden), Champmilan Kynjing (warder), Damelahun Sun (temporary warder), Pyndaphor Bamon (warder) bad Alexier Lawtam (temporary warder)

Shuh shuh na kaliang u Additional District Magistrate PK Boro ha u kyrwoh bala phah ula khot ban wan ai iaki sabut halor ka jingshah bom iap ki saw ngut ki koidi ba lait phet ha Nangrim, Shangpung Khliehmuchut.

U magistor ula kyntu ia uno uno ne ka kynhun, nongialam shnong kiba kwah ban ai iaki sakhi sabut ki lah ban wan hi dalade haka kamra treikam Room No. 120 (First Floor) haka por long trei naduh 12.09.2022-16.09.2022 ha ryngkat ki sakhi satar halor ka jingshah bom iap ki sawngut ki koidi haka 11.09.2022.