Thung u VC Incharge ka NEHU ia ka inquiry committee, kyrpad sangeh shah thngan ia ki samla pule

Syllad | The Rising MeghalayaNovember 18, 2024

Hadien ba la shimti ia ka kam, u Vice Chancellor Incharge ka North Eastern Hill University (NEHU) u Prof Nirmalemdu Saha u la thung ia ka Inquiry Committee ban pynlong ka jingtohkit halor ki jingkynnoh pyniaid kam bakla bad ka jingbym lah treikam hapoh ka skulbah kaba lam sha kane ka jinglong jingman kaba mynta.

U la pyntip ruh ba ia ka kaiphod jong kane ka Committee yn sa aiti sha ka Committee jong ki arngut ki dkhot ba la thung dang shen da ka Ministry of Education ka Sorkar Pdeng.

U Saha u la kyrpad ruh ia ki samla pule ba pynlong jingiakhih ba kin sangeh noh ia ka jingshah tngan ba khlem pud jong ki kaba la iaid mynta lah 14 sngi kynthih.

U Saha lyngba u kyrwoh u la ong, “Ban weng ia ki jingeh ba kongsan la thaw ia ka Inquiry Committee kaba kynthup ia ki nongmihkhmat na baroh ki kynhun kiba don ha ka skulbah NEHU. Ka committee kan trei borbah ban pyndep ia ka kam bad ia ki jinglap ki jong ka ia kiba yn sa phah sha ka Committee ba la thung da ka Ministry of Education. Nga pyrto ia ka jingtrei shitom bad ka jingaiti jong baroh ki dkhot kiba ia don bynta ha kane ka kam bad kyntu ia baroh ba kin kyrshan ia kane ka jingtrei ka jong ki na ka bynta ban wanrah ia ka jinglong kaba shai bad ka jingkitkhlieh.”

“Nga ngeit skhem ba ka bha ka miat jong ki samla pule ka dei ka jingsngewkhia kaba hakhmat eh jong ngi. Kum ka skulbah, ngi don hangne ban btin lynti bad pynkupbor ia ki samla pule jong ngi, bad nga pynthikna ia phi ba man ka rai ba la shim ha kane ka por kan buh hakhmat eh ia ki jingmyntoi jong ki. Nga kyrpad ia baroh ki dkhot jong ka NEHU ban ia wan lang bad ban buh sharud ia ki jingsngew iapher bad pynleit jingmut lang na ka bynta ka thong kaba baroh lang ki angnud, kata ban tei ia ka jinglong jingman kaba iaid beit iaid ryntih bad kaba sngewtynnad hapoh kane ka skulbah,” u la ong.

U la ong ba ka NEHU, Shillong ka la sakhi ia ki kynrum kynram naduh kine ki khyndiat taiew ba la dep.

“Kum u Vice Chancellor In-Charge, nga kwah ban kren sha baroh kiba don bynta hapoh ka skulbah bad kular ia basroh ba ngi la kut jingmut ban wanrah pat ia ka suk ka sain, ka jinglong jingman kaba jai jai bad kaba sngewtynnad na ka bynta ka jingpule bad ka roi ka par,” u la kular.

U Saha u la pyntip ruh ba u la shimkhia bha ha kaba iadei bad ka bha ka miat jong ki samla pule bad ba u la pyrshang ruh ban iakren la bunsien bad kyrpad ba kin sangeh noh ia ka jingiakhih ka jong ki khamtam ha kaba iadei bad ka jingshah thngan ka jong ki, kata da kaba pynpaw ia ka jingsngewkhia halor ka koit ka khiah ka jong ki.

“Hapdeng ka jingpyrshang ka jong nga katba lah ban pynkohnguh ia ki ba kin weng noh ia ki jingiakhih, nga don ka jingkyrmen ba lyngba ka jingiakren bad ka jingiasngewthuh jingmut lang shen ngin sa lah ban pyneit ia ki jingeh,” u la ong da kaba pynpaw ruh ba u la bteng ban iakren bad ki doktor kiba peit thuh ia ka koit ka khiah jong ki samla kiba shong shah thngan.

Nalor kata u Saha u pyntip ruh ba u la pynlong ruh ia ki jingialang bad ki kynhun bapher bapher kaba kynthup ia ki nongmihkhmat ka NEHU Students’ Union (NEHUSU), NEHU Non-Teaching Staff Association (NEHUNSA), bad NEHU Teachers’ Association (NEHUTA).

“Kine ki jingiakren ki long kiba tei bad ioh ia ka jingiatreilang, bad nga sngewkmen ban pyntip ba ka NEHUNSA ka la mynjur ban ailad na ka bynta ki katto katne ki jingtreikam jong ki tnad ba kongsan jong ka skulbah. Kane ka sienjam ba kongsan kan pynthikna ba ka jingpynbiang ia ka scholarship kan iaid shaid shaid bad ki bynta kiba iadei bad ka jingpule ruh kin iaid khlem kano kano ka jingthut,” u la bynrap.