Thwet jur bad ioh ksai ki pulit halor ka jingshah pyniap ha Ichamati

Syllad | The Rising MeghalayaMarch 28, 2024

Ka Tnat pulit ka Jylla ka dang pynlong ia ka jingthwet kaba jur ban ioh kem ia ki briew kiba donkti ha kaba iadei bad ka jingjia shah pyniap jong ki arngut ki briew hapoh Ichamati ha ka thain Shella, East Khasi Hills.

Na ka liang u Superintendent of Police (SP) ka East Khasi Hills u Rituraj Ravi u la ong hynne ka sngi Palei, “Ngi la lapksai ha kaba iadei bad ki katto katne ki briew ia kiba la suba donkti ha katei ka kam pyniap kaba la jia ha Ichamati. Hynrei, katba haduh mynta ngim pat shym la ioh kem satia.”

“Ngi dang pynlong ruh ia ka jingtohkit halor ka daw ha lyndet jong katei ka jingjia. Ngi kyntu ia baroh ban pynneh ia ka shongsuk shongsain bad ban ailad ia ka jingsynshar jong ka ain,” ong une u heh pulit.

Lah ban kdew ba ha ka sngi Balang ba la lah arngut ki briew kiba dei ki bar Jylla la kynnoh ba ki la shah bom iap ha ki riew runar ki bym lah satia ban ithuh ha Ichamati.

Kane ka jingjia ka la wan jia ruh ha ka por ba la pynlong ia ka jingiakhih pyrshah ia ka Citizenship Amendment Act (CAA) ia kaba la khot pynlong da ka Khasi Students’ Union (KSU) bad kiwei pat ki sengbhalang hapoh Ichamati, ong ka tyllong khubor pulit.

Nalor kata u SP u la ong ruh ba ia kine ki artylli ki metiap jong u Esan Sing bad u Sujit Dutta la lapdien na ki bynta jong ka Ichamati bad Dalda, bad ka jingpynkhreh ban pyndep ia ka post mortem ka dang iaid shakhmat.

Na ka liang ki bor pulit kaba kynthup ia ki Special Operation Team (SOT) ha ryngkat ki kali bullet proof ki la hiar mardor sha katei ka jaka na ka bynta ban tehlakam ia ka jinglong jingman bad ban pynneh ia ka shongsuk shongsain.