Tied 200 run u Aaryavir Sehwag na ka bynta ka Delhi pyrshah ia ka Meghalaya

Syllad | The Rising MeghalayaNovember 22, 2024

U Aaryavir Sehwag u khun jong u nongialehkai Cricket ba pawnam ka ri u Virender Sehwag u la lah ban kamai ia ka Double Century ne 200 run bad kaba la biang pura ia ka kynhun ialehkai ka Delhi ba kan tehlakam ia ka Meghalaya ha ka sngi kaba ar jong ka jingiakhun ia ka U-19 Men’s Cooch Behar Trophy Elite Group A ba la long ha madan jong ka MCA ha Polo, Shillong ha ka 21 tarik Naiwieng.

Tad haduh ba kut ka sngi kaba ar, ka kynhun ialehkai ka Delhi ka la lah ban kamai haduh 468 ron hadien ba ka la hap noh 2 wiket bad ba kan tam kylla da 208 ron ia ka Meghalaya, kaba la lah ban kamai 260 ron ha ka pali wan tied ba nyngkong ka jong ka.

U Aaryavir u la lah ban kamai thik 200* ron khlem out, bad la kyrshan pat ia u na sha shilliang da u Dhanya Nakra uba la lah ban kamai 98*ron, katba u Arnav Bugga, u la seng ia ka nongrim ba khlain ia la ka kynhun ban kamai 114 ron.

Kane ka jingskhem bha ka rukom ialehkai ki batsman jong ka Delhi ka la  pynlong ia u kapten jong ka Meghalaya u Dipankar Baruah ba un kylliang ne ban bujli ia la ki bowler na kawei ka por sha kawei pat, hynrei kane kam shym la don jingktah eiei ia ki batsman ka Delhi kaba I kumba ki bang bad sngewtynnad bha ban ialehkai ha kane ka madan.

Haba phai biang sha u Aaryavir, ym lah ban len ba dei ma u, uba la lah shisha ban pynshoh biej ia ki khmat ki nongwan peitkai ia kane ka jingiakhun, namar u da pynpaw shisha ia ka sap ba tbit bad ba pnah bha ka jong u ha ka batting, katno tam lei lei ban pynpaw ia ka rukom tied (shots) ha baroh ki bynta ka madan.

Hashwa kane ka Meghalaya ha ka pali wan tied ba nyngkong ka  jong ka, ka la lah ba kan kamai sa 21 ron na ka 239 ron na ka bynta 7 wiket ba ka la lah ban kamai ha ka sngi ba nyngkong, ha kaba u Kshitij u la bteng ban kamai 62 ron katba u Angkit Tamang, 29 ron.

Kumta kaei kaba sah ka long ban peit ban khmih ba haduh katno ka Delhi kan kamai shwa ba kan ailad biang ia ka kynhun ka Meghalaya ba kan wan ban tied ia ka pali kaba ar.