Tlot ka jingap pahara ha EJHD lait phet tuh arsien ki nongtrei bylla bar jylla

Syllad | The Rising MeghalayaApril 30, 2020

Ki pulit jong ka Ummulong Beat House, West Jaintia Hills District kiba ap pahara ha surok bah ki la ioh bat haduh 65 ngut ki bar Jylla kiba la phet tuh na Khliehriat, East Jaintia Hills District da kaba rieh ha ka body jong kawei ka trok kaba don ia u nombar AS 01-FC-3389.

Kaba lyngngoh shisha ka long ba kumno kitei ki briew ki ioh phet tuh naduh Khliehriat haba ka jingap pahara ha ka khyrdop Tuber Shohshrieh, East Jaintia Hills District ka long kaba jur bha.

Namar ki pulit ba don duty ha katei ka jaka ki dang kylli tohkit bha ia ki briew shaei ki mut ki leit bad ki da dawa ia ki sabut satar shwa ban pyllait ia ki kali ban leit

Kane ka jingphet tuh ki nongtrei bylla bar jylla ka long ka sien kaba ar namar dang mynshisngi 55 ngut ki nongtrei bylla bar jylla ki la ioh phet tuh na Khliehriat bad poi shaduh Byrnihat, Ri Bhoi District.

Ha ka jingtohkit jong ki pulit, kitei ki bar Jylla ki iathuh ba kidei ki nongbylla sngi bad kiba phet tuh na Khliehriat, East Jaintia Hills District bad thmu ban leit phai sha ka Guwahati da kaba rieh ha ka body jong katei ka trok.

Hynrei da ka jingshim khia jong ki pulit jong ka West Jaintia Hills la ioh ban bat ia ki ynda ki la poi ha Ummulong shwa ba kin ioh rung sha East Khasi Hills.

Hadien ka jingtohkit ki pulit ki la phah leit phai biang iaki sha Khliehriat namar ka sorkar kam pat shah ban iaid na kawei ka Jylla sha kawei.

Kumba yn shu pynkynmaw, kane kadei sien kaba ba ki bar Jylla ki la ioh lad ban phet tuh na Khliehriat.