Tohkit ka WHO halor ka khubor ba mih paw ka jingpang wild poliovirus ha Meghalaya

Syllad | The Rising MeghalayaAugust 22, 2024

 Ka Myntri ka Tnad ka Koit ka khiah ka Dr. Ampareen Lyngdoh kala pyntip ba ka World Health Organization (WHO) ka dang pynlong ka jingtohkit bniah halor ka jingsuba mih paw biang ka jingpang wild poliovirus hapoh ka Jylla.

Ka Dr Ampareen kala iathuh ba la suba ba kane ka jingpang kadei ka wild polio bad ka long pher na ka jingpang polio kaba la duh jait ha baroh kawei ka Ri India.

“Ka Sorkar Jylla lyngba ka tnat ka koit ka khiah kala shimkhia bad kala buddien ia i khynnah ba suba ioh jingpang wild polio hapoh Tikrikilla West Garo Hills,” la ong kane ka Myntri.

Nalor kata kala iathuh ba kumba ka long mynta hi ine i khynnah i don ha ka met ka ba koit ba khiah bad na ka liang ka Sorkar Jylla ka dang ap ia ki jingbthah na ka WHO ha kaba iadei bad ki sienjam ban shim halor kane.   

Kumjuh ka la iathuh ruh ba ka Sorkar Jylla kan ap ia ki bthah na ka WHO la ka donkam ne em ban shna biang bad ban ai tika na ka bynta kane ka jingpang wild polio.

Nalor kane ka Myntri ka tnat ka koit ka khiah ka la ong ruh ba ka don ka jingbym kwah ki kmie ki kpa ban ai injek ia la ki jong ki khun ki kti. “La donkam ban pynlong da ki program ialap paidbah halor ki jingpang khunlung kiba don jingma hadien ha bud khnang ba ki paidbah khamtam ki kmie ki kpa kin long ba kloi ban ai injek ia la ki khun ki kti” kala bynrap.