Torti ka jingtrei surok NH-6, dawa u MP Shillong na u Gadkari ban pynlong da ka quality audit ba laitluid

Syllad | The Rising MeghalayaMarch 12, 2025

U MP ka Shillong uba dei ruh u General Secretary ka VPP u Dr. Ricky AJ Syngkon u la dawa ban pynlong da ka jingpeit bniah (quality audit) kaba laitluid ha kaba iadei bad ka jinglong jingman jong ka surok NH-6 khnang ban lah ban ai jingkhein ia ka rukom pyntrei torti bad ban pynthikna ia ka rukom pyntreikam kaba bud pyrkhing katkum ki kyndon khnang ba kum kine ki jingjia kin ym jia shuh hadien habud.

Ia kane ka jingdawa la pynpaw da une u MP ha ka shithi sha u Myntri ka Sorkar Pdeng uba khmih ia ka Road Transport and Highways u Nitin Jairam Gadkari ha ka 11 tarik Lber mynta u snem.

Katkum ka shithi, u MP ka Shillong u la ong, “Nga kwah ban wanrah sha ka jingtip jong phi ba ka jinglong jingman jong ka surok bah National Highway-6, kaba dei ka lynti ba kongsan kaba pyniasoh ia ka Jylla Meghalaya bad kiwei ki Jylla, kaba pynbiang ia ka kam khaii pateng nalor kiwei pat kynthup halor ka kam jngohkai pyrthei ha ka thain.”

U la ong ruh ba watla kane ka project ka long kaba kongsan bha, hynrei ka jingpyntreikam ia kane ka surok ka long kaba iaid suki haduh katta katta bad kaba kham sngewkhia ka long halor ka rukom pyntrei kaba torti.

Haba jubab halor kiba bun ki jingujor ha kaba iadei bad ka jingpyntrei torti ia kane ka surok, u Dr Syngkon u pyntip ba u la shaniah ha uwei u nongpeit ba un jurip ne pynshisha ia ka jaka ban jurip bniah ia ka jinglong jingman ha ka rukom pyntrei.

U la bynrap ruh ba ka video jong ka jingleit jurip ia ka surok bah ha ka shnong Kuliang ka pynpaw shai ba ka surok kaba la dep siang ka dei kaba lah ban pied tang da ka kti kaba pynpaw shai kdar ia ka jingtrei torti, ka jingpyntreikam bha ia ka kam bad ka jingpyndonkam da ki tiar ki bym bha da ki kontraktor.

Nalor kata u la ong ruh ba kum kane ka rukom pyntrei ka ktah jur ia ka jinglong jingman bad ia ka jingneh slem jong ka surok khamtam eh hapdeng ki jingeh ha ka jinglong ki jaka bad namar ka jinglong jingman jong ka suinbneng.

Kumta ruh na ka liang u MP ka Shillong u kyntu jur ia u Myntri ka Sorkar Pdeng ba un tuklar lem mardor bad ban shim ia ki sienjam ba tyngeh ban pynbeit halor kine ki jingduna.