Trei ka bih tit, Iap 6 ngut, wanrah hospital biang 1, shitom jur 2 na Lamin

Syllad | The Rising MeghalayaMay 5, 2020

Haduh mynta 6 ngut ki briew kila duh ei ïaka jingim ba kordor, haba sa kawei ka khynnah 14 snem kala khlad noh ha hospital naka jingshitom jur hynnin ka miet Nyngkong hadien bala trei ka bih tit uba kila bam bad kheit na khlaw haka shnong Lamin.

Ha kane ka jingbam tit haduh 18 ngut kila shitom na ki lai tylli ki longïing na Lamin ka shnong kaba hap ha Amlarem Sub Division.

Kane kaba la khlad hynnin ka miet, ka dei ka Marriaba Khonglah (14), kala khlad haka por kumba 11:35 pm ha North Eastern Indira Gandhi Regional Institute of Health and Medical Sciences (NEIGRIHMS), la iathuh u Waheh Shnong Golden Gashnga.

U Hynmen jong ka u Armstrong ula khlad haka sngi U Blei uba shah sumar ha kane ka juh ka hospital.

Ka Marriaba u Amstrong ki dei ki shipara bad u Katdilia Khonglah (26) uba la khlad marsien trei ka bih tit haka 19 tarik u bnai Iaiong ha ryngkat u Morison Dhar (40).

Kiwei pat ki para jong u Katdilia kiba la khlad ki dei ka Synran Khonglah (16) bad Lapynshai Khonglah (28)

Ar ngut ki para jong u Katdilia ki dang shah sumar bad u khynnah 7 snem u Dimah Gashnga, u khun jong u Morison.

Shuh shuh kawei na ki para jong u Katdilia kaba la mih na hoispital dangshen, kala shitom biang bad la sumar iaka ha Woodland Hospital.

U Myntri ka tnad Pule u ma Lahkmen Rymbui ula phah khubor sngewlem sha kine ki longïing kiba iakynduh ia kane ka jingjia ba sngewsih.

“U lyoh badum u wan tap ia ka Shnong Lamin ha kine ki 2 taiew ba mynta 04/05/2020 la khlad biang sa iwei I mynsiem kordor ba bam u tit khlaw. Haduh mynta la 6 ngut ki la iap bad sa 3 ngut ha Hospital kynthup ia iwei iba la mih Hospital la wan rah biang mynne, Duwai lem ia U Blei,” la thoh u ma Lahkmen.