Trei ka dewbilat, mar ia pyneh u Balen Thubru bad u Kyrshan Dkhar kam ba ki dei ki president AJCCTA

Syllad | The Rising MeghalayaOctober 19, 2021

Katba ka jingiakhih ban dawa kyntiew iaka bai kit dewbilat bad dew shna dewbilat (Clinker) na ki karkhana dewbilat kiba don ha Rilum Jaiñtia ka dang iaid shakhmat, kaba thamula pat ka All Jaintia Cement and Clinker Transporters, Association (AJCCTA) kala pait arliang bad kala mih ar kynhun ha kaba kala don ruh ka jingkam president da ki arngut kaba kynthup ia u Balen Thubru bad u Kyrshan Dkhar.

U Balen Thubru u dei uwei na ki nongialam ba pawkhmat jong ki trai trok kiba shalan Cement bad Clinker bad u dei u president jong ka AJCCTA hashuwa ba kan mih ar kynhun, katba u Kyrshan Dkhar u dei u general secretary AJCCTA. U dei ruh u general secretary ka Jaintia Hills Truck Owners Association (JHTOA).

Shah weng kam president AJCCTA u Balen Thubru

Baroh ar ngut, u Balen bad u Kyrshan kila kam ba ki dei ki president ka AJCCTA ha kaba ka kynhun u Balen kala kam ba kala dep jied nongkitkam haka 2 tarik une u bnai. Ula ong ba kumba long mynta ka AJCCTA ka la ioh ia u Secretary uba sngewthuh ia ka jingeh ki Transporter namar ba une u Secretary thymmai u dei ruh u Transporter ym dei satia kum ba long u Secretary barim (Kyrshan) u bym dei satia u Transporter hynrei la shu thung ia u da kaba siew tulop, la iathuh u ma Balen Thubru.

Une u secretary thymmai haka kynhun u ma Balen u dei u Boneyfast Rymbai uba dei uwei na ki para ba leh Transport.

Pynshai u ma Balen Thubru halor jingshah wengkam president na ka AJCCTA

U Kyrshan Dkhar ula kam ba hadien ba u Balen Thubru ula khot jingialang jied nongkitkam sop sop ha katei ka 2 tarik. Haka 12 tarik une u bnai kila khot iaka jingialang kyrkieh kaba la iadonlang ruh u ma Balen. Ha kane ka jingialang da kawei ka sur la rai ban weng kam president ia u Balen bad kynnoh ba ula iaid lait iaka kyndon treikam ka AJCCTA bad la jied syndon da u acting president kaba ula kam ba ka jingialang kala jied ia u (Kyrshan Dkhar) bad acting secretary ia u Shaphrang Pajuh.

Kane ka kynhun kaba ialam u Kyrshan kala khot jingialang haka sngi ba ar (19/10/21) bad la jied president ia u (Kyrshan), u Pynshngaiñ Papang kum u Vice president, u Shaphrang Pajuh kum u Secretary bad u Ombormi Tariang (President JYF) kum u Assistant Secretary, u Prakash Phawa kum u Treasurer  bad la jied ruh iaki dkhot ka executive committee.

Kane ka kynhun kaba ialam u Kyrshan haka jingïalang ka la rai ban ïasnoh kti lang bad ban ïatreilang ryngkat bad ka JHTOA ban pynurlong ïaki jingthmu ban khanglad ïaka jingthied trok ki karkhana pynmih dew bilat ha East Jaintia Hills District.