Trei tyngeh u ma Sniawbhalang Dhar ban pan jingkyrshan iaka kyrtong NPP na Shillong Parliamentary seat

Syllad | The Rising MeghalayaFebruary 9, 2024

U Ma Sniawhalang Dhar, symbud myntri rangbah uba long ruh u National general secretary ka National People’s Party (NPP) ula trei tyngeh ban pan jingkyrshan na ki nongialam bad nongtrei party ban pynthikna ban pynjop iaka kong Ampareen Lyngdoh ka kyrtong na Shillong Parliamentary seat ha ka election MP Lok Sabha ka ban wan.

Haba kren haka jingialang kaba long Wahiajer kaba hap ha Nartiang Constituency kaba u mihkhmat bad ha Jowai haka 8 tarik Rymphang, ula khot iaki nongialam bad ki nongtrei ka party ban trei shitom ban pynthikna ba ka kong Ampareen kan jop na Shillong Constituency

Ha kine ki ar tylli ki jingialang la iadonlang ka MLA Sutnga Saipung, Santa Mary Shylla, MLA Jowai Wailadmiki Shylla, CEM JHADC Thombor Shiwat, State Working President u Bah Hamletson Dohling nalor kiwei kiwei.

Ka Ampareen haba kren kala kyrpad ia ki nongshong shnong ka Nartiang bad Jowai ban jied ia ka ha kane election MP Lok Sabha ka ban wan.

“Jied ia nga kum ka MP ka jong phi ngan pyrshang katba lah ban pynbit pynbiang bad wanrah ki jingdonkam jong ka Jylla sha ka sorkar pdeng la kadei ki skhim bapher bapher ne kiwei kiwei ki jingdonkam khlem da leh shilliang la ka long ha ka niam ne kiwei kiwei”, la ong ka kong Ampareen

Kala pynthikna ruh ba shen yn plie paidbah iaka Ayush Hospital ha ka shnong Mookyndur, West Jaintia Hills District. Kane ka project ka la kynjoh haduh T.10 klur.

Ka Dr. Ampareen ka la kyntu ruh iaki MDC ka JHADC ba kin jied iaka kum ka nongmihkhmat sha ka sorkar pdeng bad ba kan iasaid iaka jingeh jong ki khamtam ha kaba iadei bad ki skhim kiba wan lyngba ka sorkar pdeng.