Tuid da ki hajar sha ka rally na ka bynta ban wanrah jingsuk ha Manipur 

Syllad | The Rising MeghalayaAugust 5, 2023

Da ki hajar ngut ki paidbah haka sngi Saitjain ki la wan ban iashimbynta ha ka jingiaid rally ba la khot pynlong da ka Catholic Association of Shillong (CAS) ha ryngkat ka jingiatreilang bad ka Meghalaya Church Leader Forum bad ka Khasi Jaintia Christian Forum na ka bynta ban wanrah pat ia ka jingsuk hapoh ka jylla Manipur.

Ia kane ka jingiaid rally la sdang naduh ka por mynstep na madan Iewrynghep bad pynkut ha Don Bosco Mini Stadium, Laitumkhrah, Shillong.

Ha kane ka jingiaid paidbah ba la ialam da u Archbishop Victor Lyngdoh la iashim bynta lang ruh da u Bishop jong ka Nongstoin, ki nongialam niam bapher bapher na kylleng, ki phadar, Sister, ki nongmihkhmat paidbah, ki longkmie longkpa, ki samla pule, khynnah skul bad kiwei kiwei.

Ha kane ka rally la sakhi ruh ia ka jingrah ia ki placard da ki nongiashim bynta ha ryngkat ki jingthoh bapher bapher kiba kyntu na ka bynta ban wanrah pat ia ka jingsuk hapoh Manipur.

Ha ka jingialang ba la pynlong hadien kane ka jingiaid rally la ioh ia ka jingkren na ki nongialam niam bad kiwei pat ki nongialam kiba la ia don lang ha kane ka sngi.

Ka jingpynlong ia kane ka jingiaid paidbah ka long ban pynpaw ka jingsngewlem halor ka jingiaumsnam kaba la khie hapdeng ki jaidbynriew Kuki bad ki Meitei ha ka jylla Manipur kaba la sdang naduh ka 3 tarik u bnai Jymmang ba la dep bad kaba la shim ia ka jingim jong ki spah ngut ki briew nalor ka jingshah thang dusmon jong ki spah tylli ki iingmane bad ki iingbriew bad pynkylla phet shnong ia ki hajar ngut kiwei pat.

Ha kane ka sngi na kaliang ka Balang la pule paidbah ka dorkhat kaba kin phah sha ka President ka Ri India ka Droupadi Murmu lyngba u governor ka jylla u Phagu chauhan.