Tuid da ki phew hajar ngut ki paid riewngeit sha ka Proseshon bah 2024 ha Laitumkhrah

Syllad | The Rising MeghalayaNovember 10, 2024

Da ki phew hajar ngut ki paid riewngeit ka Balang Katholik ki la wan iashim bynta sha ka Proseshon bah ne ka ‘Eucharistic Procession’ ba ju pynlong man ka snem ha Cathedral of Mary Help of Christians, Laitumkhrah, Shillong ha ka 10 tarik u Naiwieng.

Ka Proseshon Iukharist ka dei ka jingpynpaw ia ka jingngeit ha ka jingdon ryngkat U Jisu Khrist ha ka Iukharist Bakhuid. Ym don da kawei pat ka jingmane lehniam ha ka Balang Katholik ka ban kham khraw ban ia ka Iukharist.

U Archbishop ka Shillong u Most Rev Vector Lyngdoh u la long u Kongsan ha ka jingpyndep ia ka Mass Bakhuid bad shim ruh ia ka Sakrament Bakhuid na ka bynta ka Proseshon.

Ha ryngkat u Archbishop Victor Lyngdoh la ia don lang ruh ki dkhot ka council ka Archdiocese.Kiwei pat kiba la ia don lang ki kynthup ia ki Parish Priest, ki Rector, ki Major Superior, ki Provincial, ki MLA, ki MDC, Deputy Commissioner ka East Khasi Hills, ki ophisar ki Tnad sorkar Jylla, ki nongmihkhmat na kiba bun ki Diocese jong ka than Shatei Lammihngi bad na kiwei pat ki bynta jong ka Ri India.

 Ha ka Mass Bakhuid ha ka por mynstep, u Archbishop u la pynpaw ka jingsngewnguh ia ka jingaiei jong kiba ngeit sha ka jingdonkam jong ka Balang.Ban iohi ia U Blei ha ka jingiaid lynti jong ka jingngeit ka long ka bynta kaba kongsan ha ka jingim jong ki paid Khristan.

Dei ha kaba kum kane ka sngi leh niam ba u la pynkynmaw ia ki 90 tylli ki snem kiba la leit noh, kata ha ka 10 tarik u Naiwieng 1934 ha kaba u Bishop Stephen Ferrando bad u Bishop Louis Mathias ki la shah pynkyntang Bishop da u Archbishop Ferdinand Perier ha kajuh ka jaka, kata ha Calvary jong ka Cathedral of Mary Help of Christians, Laitumkhrah.

U la pynkynmaw ruh ia ka jingdap shspah snem ka jingwan poi jong u Missionary bakhraw u Fr Constantine Vendrame hapoh Rilum Khasi Jaintia. 

Ha ka nohphai sngi, u Archbishop u la pynbna ia ka snem Jubili 2025 jong ka Balang ha ka pyrthei ha ryngkat ka phang pdeng, “Pilgrims of Hope.” Ha ka juh ka por la pynbna ruh ia “Ka Snem jong ka Sakrament Jingpyniasuk.” Ka jingrakhe ia ka Diamond Jubilee kan long ha u snem 2029, bad ka Centenary year jong ka Archdiocese ha u snem 2034.

La pynkut ia kane ka sngi da ka jingkyrkhu kyrdoh ba kynsai na ka jingaiei jong U, u Archbishop Victor Lyngdoh.