Tuid ki khubor sngewlem halor ka jingkhlad u Bah HS Shylla

Syllad | The Rising MeghalayaAugust 7, 2020

Ka Federation of Khasi States (FKS), ka Federation of Khasi Jaintia and Garo People (FKJGP) bad ka East Jaintia National Council (EJNC) kila phah iaka khubor sngewlem sha kiba haiing hasem u Bah HS Shylla uba la khlad noh ha ka sngi Thohdieng.

U Adviser & Spokesperson, Federation of Khasi States, Bah John Kharshiing, ula ong “Ka long shisha ka jingduh kaba khraw ia ka Ri Khasi baroh kawei, ngi iai kynmaw ia ki kam kiba ngi la ia kynduh bad ia kren mynta da ki phew snem ym lah ban jer lut ia ki kam hangne hynrei sngewdei ban pynpaw ia ka jingsngewkhia jong i na ka bynta ka jingdonkam kyrkieh ia ka jingiada ka jaidbynriew ha kaba ngim lah ban klet ba i la long uwei na ki samla ba hakhmat 42 snem mynshwa kiba la ialeh shitom ban pyniatylli ia ki seng sain pyrthei ban ioh ia ka sorkar lai lama ha ki snem 1978-1979.

I la dei u nongmihkhmat uba kyrpang ia ka jaidbynriew Khasi ha kaba ngi lah ban ong ba i la long u nongmihkhmat u nongialam u nongthaw ain shisha ha KHADC uba la pruid dak ia ki katto katne tylli ki ain Hima /Elaka kumba ki paw mynta hapoh KHADC.  Ngim lah ban klet ba i la long u Chief Executive Member, uba nyngkong ha ka history jong ka KHADC ban lum ia ka Dorbar Hima Mylliem hadien 18 snem ha ka 7 tarik Nailur 2018 (mynta dap ar snem thik ba i la lum ia ka Dorbar Hima Mylliem) ha madan polo, kaba i la iawer lang ia baroh ha ryngkat u khun u hajar ban ia mih ryntih bad khamtam ki kyntien jingkren jong i ha katei ka sngi ki long kiban sah kynmaw kum shibynta ban pynneh pynsah bad ban pynjanai ia ka Riti Dustur ka jaidbynriew.  Ngim lah ruh ban klet ia ka jingiasyllok ka jingsngewkhia ka jingiarap ka jong i dang shen halor kito kiba sahkut shabar jylla ban iarap ia kiba wanphai biang sha la ka Ri.”

Ka Federation of Khasi Jaiñtia & Garo People (FKJGP) ka pynpaw ia ka jingsngew kyndit bad ka jing sngew sih kaba khraw haduh katta katta halor ka khubor ka jingkhlad noh jong uwei na ki nongmihkhmat ba la rim ka jylla Bah HS Shylla.

“Ngim lah khlem da kynmaw ia u synniang jong une u Rangbah Nongialam uba la trei shitrhem ban tei bad ban iada ia ka jaidbynriew na ki jingma kiba ap hakhmat ia kaba ula pyni mynba u dang bat ia ka shuki Chief Executive Member jong ka Khasi Hills Autonomous District Council.  Kum u CEM, u Bah Shylla ula wanrah ia shibun ki aiñ ban pynim ia ka jinglong ba kyrpang bad ruh ia ka riti ka dustur jong ka Jaidbynriew kum ka nuksa ka jingwanrah ia ka Khasi Social Custom of Lineage (First bad Second Amendment) Bill ba kheiñ Bar Jylla ia ki Khasi ba ai jait Kpa bad kumjuh ruh ia ki khun jong ki Kynthei Khasi ba iashong kurim bad ki Bar Jylla, nalor ka KHAD (Khasi Social Custom of Clan Administration) Bill, 2018 ba tehlakam ia ka jingtuh jait jong ki Bar Jylla.

Watla kine ki Bill ki dang sahkut ban long aiñ hynrei ka jingwanrah ia ki da une u Rangbah ka pyni ia ka jingieid ia ka jaidbynriew bad ka jingpyrshang kumno ban wanrah ia ki lad ki lynti ban weng ia ki jingma kiba ap ia ka Jaidbynriew.

Ha ka jingbishar jong ngi, dei tang u Bah Shylla kum u Nongialam paidbah uba la pynsawa jam ia ka sur ban dawa ia ka Inner Line Permit hapoh ka Jylla bad ban pyrshah jur ruh ia ka Citizenship Amendment Act jong ka Sorkar Pdeng, kaba la iakhih da ki kynhun Sengbhalang bapher bapher baroh shikatta.

Ka seng ka phah ka jingsngewlem sha I Lok, ki khun ki kti bad baroh kiba ha iing ha sem. Ngi don tang ki jingduwai ban tyrwa kum ha kane ka por ba U Blei un don ryngkat bad phi ban aibor ia phi baroh. Ai ba ka mynsiem jong I bah Shylla kan ioh ia ka jingjah thait ka bym juh kut ha ka Hima Bneng. Leit suk Bah Shylla,” la ong Eldie N Lyngdoh Vice President FKJGP

Shuh Shuh ka EJNC kala ong ba ka jingkhlad u Bah Shylla ka dei ka jingduh kaba khraw iaka jylla bad ka jaidbynriew baroh kawei. Ka EJNC kala ong ba ym lah ban jer iaki kam u Bah HS Shylla namar ba kiba bun ki kam kiba ula leh ki dei ki jingmyntoi ka imlang ka sahlang.

Ka jingkhlad u Bah Shylla kam dei ka jingduh tang iaka iing ka sem, hynrei iaka jylla bad ka jaidbynriew baroh kawei bad kala pynpaw ba kan buh ha ka jingduwai ha U Blei un pyntngen iaka iing ka sem jong u Bah Shylla baroh.