Tuid ki paidbah sha ka jingialang u CEM JHADC, kynthoh ïa u nongïalam ka VPP halor ka aiñ Village Development Council

Syllad | The Rising MeghalayaFebruary 11, 2025

Ki paid nongkyrshan jong u Ma Thombor Shiwat, Chief Executive Member (CEM) jong ka Jaintia Hills Autonomous District Council (JHADC) bad kyrtong ka National People’s Party (NPP) na Moodop Umladang, ki la wan ïa shimbynta shitrhem ha ka jingïalang paidbah kaba long ha madan ka shnong Thadmynri ha ka 10 Rymphang.

U Ma Thombor, haba pan biang ïa ka jingkyrshan u paidbah, u la kyntu ïa ki ban ai ka jingkyrshan kaba pura da kaba nion ïa u budam ka kot (NPP), namar ba ka dei ka party kaba synshar ïa ka jylla mynta. U la ong ba lada ka NPP ka khur jingjop ha ka elekshon JHADC, ki kam pynroi kiba bun kin sa tuid sha ki shnong ki thaw.

Haba kdew iaka elekshon MP kaba la dep, ym lah ban len ïa ka jingshisha ba ki paidbah ki la shah ïalam bakla ha ki ktien ja-li ja-um jong ka VPP. Hynrei, ka la long lehnohei hadien ba la jop, namar ka sorkar jylla ka ai tang kawei ka agenda ïa ka VPP ban kren halor u pud u sam hapdeng ka Meghalaya bad Assam hapoh Parliament. Hynrei, haba la wanrah ïa ka agenda hapoh Parliament, ym shym la lah ban leh eiei namar u MP jong ka VPP u long marwei bad ym don ba ithuh ïa ka party VPP.

Haba ïadei bad ka aiñ Village Town Development Council, kaba thmu ban pynkup bor ïa ki nongïalam shnong bad kaba la wanrah ha ïing dorbar thawaiñ ka konsil, u Ma Thombor u la ong ba kane ka aiñ ka long na ka bynta ban pynthikna ba ki rangbah shnong kin ioh bynta lang ban shong pyrkhat halor kano kano ka jingtyrwa kaba ïadei bad ki kam pynroi hapoh shnong bad ki MDC.

U la ong ba bun ki pynsngewthuh bakla ïa kane ka bill, da kaba kynthoh ruh halor ka jingong jong u Bah Ardent ba ka jingwanrah ïa kane ka bill ka lah ban long ka kam kaba ma kaba lah ban pynkhlaiñ bor ïa ka direct funding. U Ma Thombor u la ong, “Lada ka dei ka direct funding, kan kham bha, namar mynta ka District Council ka dang tlot bor namar ym pat ioh ïa ka direct funding. Kano kano ka skim ka hap ban wan lyngba ka sorkar jylla, hadien pat ka sa poi sha District Council bad sa pyllait sha ki shnong.”

Shuh shuh, u la pyntip ba kum u nongïalam hapoh ka konsil, u la wad ki lad ki lynti ban kyntiew ïa ka kam rep ka riang, bad bun ki proposal ki la dep ban phah sha Delhi na ka bynta ban pynkhlain ïa ka kam rep synsar, sying, shyrmit bad kiwei kiwei ki mar rep. U la pyntip ruh ba kin phah da ki expert ryngkat ka jingïatreilang bad ka sorkar jylla ban leit sorbe ïa ka khyndew ka shyiap, bad ban peit na ka bynta ka jingthung jingtep kaba lah ban wanrah jingmyntoi ïa ki paidbah. U la ong ruh ba mynta, u synsar, sying bad shyrmit ki dei ki jingthung kiba la dep ban ithuh, bad kin don ki skim kiba heh na ka bynta jong ki, ha kaba ka EC ka la dep ban buh mang pisa na ka bynta u paidbah.

Kumta, u la kyntu ïa ki paidbah ba kin ym kyntait ïa ka roi ka par bad ban kyrshan biang ïa u ha kane ka kynti, khnang ba un lah ban pyndep ïa ka kamram kaba la bynshet ha u.

“Nga ngam artatien, lada ki paidbah ki pynjop ïa nga, nga lah ban wanrah ïa ka roi ka par namar nga sngewthuh, lada nga jop, ym don jingeh ïa nga ban ïakren bad ka sorkar jylla, namar ka sorkar ka dei ka jong ngi,” la ong u Ma Thombor bad bynrap kum u MDC uba la jop 15 snem lynter, u sngewskhem ba ha kane ka kynti ruh un wan biang ha ka thong ka jingjop.