Tuid ki paidbah sha ka Kiew Pyneh Rngiew ba 25 sha u kliar u Lum Sohpetbneng

Syllad | The Rising MeghalayaFebruary 5, 2024

Ka jingkiew pyneh Rngiew sha u Lum Sohpetbneng ba shisien shisnem kaba pynlong da ka Lum Sohpetbneng Committee ka Seng Khasi Kmie kala long kaba jingiphuh I phieng bad la wan tuid jong ki paid na kylleng ka Bri u Hynñiewtrep Trep  Hynñiew Skum haka 4 tarik u Rymphang 2024.

Kane ka jingkiew pyneh rngiew ha u Lum Sohpetbneng kadei ka sien kaba 25.

Kane ka jingkiew Pyneh Rngiew sha utei u Lum Sohpetbneng ka dei kaba la sdang naduh u snem 2000 bad naduh utei u snem ka Seng Khasi Kmie ka ju pynlong ïa kane manla ka sngi Robibar ha ka taïew ba nyngkong jong u bnai Rymphang,  kane ka jingkiew pyneh rngiew khamtam na ka bynta ki pateng longdien mandien kiba dang bat dang ksoh rydin ha la ka jong ka niam  Tynrai, ki shim ba  shisien shi snem, u khun bynriew u donkam ban pyneh la ka jong ka  rngiew ka rwiang bad katkum ka jingngeit tynrai hi kum u Khun bynriew u dap da ka jingainguh ïa u Blei Nongbuh Nongthaw ha ka jingkyrkhu kyrdoh bad ka jingthehsei ba khlem pud jong u.

Ha kane ka sngi hashuwa ka jingsdang ban ïa kiew paidbah sha kliar utei u Lum, u Riew Tymmen Riew San ka Seng Khasi Kmie, ki da pynlong biang ïa ka nguh ka dem ka duwai ka phirat na khyrdop kaba don mar pyrshah bad ka Pung Umiam, kaba hangne ynda haba la sakhi lut ia ki dak ki shin kum na ka kyntien ka jutang hok kaba la dep ban ïa pan, la sdang ka jingïakiew paidbah sa sha kliar jong u Sohpetbeng.

Hadien kane hakhmat ka duwan dupat kaba don ha kliar jong utei u Lum, ba u riew tymmen riew san, u la shim ïa ka bynta ban pyndep ïa ka nguh ka dem lyngba u khaw bad ka um ban suit ban shor ban pynsum pynsleh ïa ka duwan ka dupat ka dak ban pynkyntang pat ïa ka, da kyntien pun lynti sha U Blei Nongbuh Nongthaw ban kiew ha ka jingkieng ksiar ka long mynta da ka mynsiem khuid nylla ka mynsiem ksiar, kaban sa plie lad ïa u paidbah bylleiñ ban ïa ïoh lem ban ïuh kjat halor jong ka bad shipor ban dem pynleit jingmut ïalade bad dwai bad ban ïasaid ïa thew bad  U Blei Trai Kynrad ba un ri un kdup un sumar sukher, un theh sei ïa ka kyrkhu ba na sha lyndet ba u khun bynriew un iai bteng ban nang roi parum pareh ha snieh jong kane ka sla pyrthei.

Ha kane ka sngi ha ka jingïalang la pynïaid da u vice Chairman ka Lum Sohpetbeng Committee u Rgh Païa B Synrem, la ïoh ïa ka kyntien pdiang sngewbha na u Chairman ka Lum Sohpetbneng Committee u Rgh I Sun bad ïa ka kyntien maitphang bad ka khana lyngkot kaba la ai da u Rgh D.L Nongbri vice president Seng Khasi Kmie bad u dkhot jong ka Lum Sohpetbneng Committee.