Tuid ki riew ieid kot sha ka Shillong Book Fair hadien ba la ailad ka mariang

Syllad | The Rising MeghalayaOctober 7, 2024

Ka jingpynlong ia ka ‘Shillong Book Fair’ ne ka iew kot ba la khot pynlong da ka National Book Trust-India kaba happoh ka Ministry of Education ka Sorkar India ha ka sngi kaba ar ha ka 6 tarik Risaw hapoh State Central Library ka la sakhi ia ka jingwan iashim bynta jong kiba bun bah ki ‘riew ieid pule kot na kylleng, kata hadien ba ka mariang ka la ailad hadien ka jinghap slap naduh kine ki khyndiat sngi ba la dep.

Ha kane ka iew kot la sakhi ruh ia ka jingwan jngoh da u Swapnil Tembe, IAS, Director ka Tnat pule puthi ka sorkar Jylla. “Ka jingdon jong ki thup kot hangne ka long kaba biang bha. Nga la jurip bniah ia kane ka iew kot palat ar kynta bad thied haduh 10 tylli ki kot. Nga la thied ruh katto katne tylli ki kot ha ka 5 tarik ba la dep,” ong u Tembe ia uba la tip bha halor ki sienjam kiba u la shim ha kaba iadei bad ka pule puthi ha ka Jylla Meghalaya.

Haba pynksan halor ka jingdonkam ban pule kot man ka por, u Tembe u la ong, “Haba ngi pule kot, ngi thaw ia ki dur ha ka jingmut jingpyrkhat jong ngi. Ngi long kiba smat ba sting haba ngi pule kot. Hynrei haba ngi peit ia ki dur khih ne visuals ngi iaid ha la ka mon ha ki jingmut jingpyrkhat.Kumta ka long kaba donkam ban pynroi ia ka jingsngewtynnad ban pule kot.”

Ka samla pule Class XI ka APS, Shillong ka Shrishti Biswas ka dei kaba ieid ia baroh ki jait kot.Hynrei, ka la kham pynleit jingmut ia ki kot kiba don jingiadei bad ka jinglong mynsiem bad ka la wan khnang ban ioh ia ka kabu kaba biang tam. “Nga la wan jurip ia ka NBT book fair ha u snem ba la dep kumjuh.

Ka Laaijanai Kshiar ka khynnah 9 snem rta ka kup ia ka dur kaba i kmen katba ka dang phaikhmat sha ki kot jong ki khynnah hapoh ka stall. U mama jong ka, u Bah Hamekhrawnam Wankhar u la ong ba ka dei ka khynnah kaba sngewtynnad bha ban pule kot. “Ka sngi UBlei ka dei ka sngi kaba biang tam na ka bynta jong ngi ba ngin ioh lad ban leit jngoh ia kum kine ki iew kot.”

Kumjuh ka Rebecca Thabah kaba la rah buntylli ki kot ka la ong ba kam pep ia kane ka iew kot NBT book fair. “Kumba phi iohi nga dei kaba sngewtynnad ban pule kot. Nga sngewtynnad ruh ban pule ia ki kot ki khynnah.Nga dei ka nongkyrshan jong u Harry Potter. Ha kane ka kynti nga la ioh ia ka thup ‘Shatter Me’ series bad katto katne ki kot jong k khynnah,” ka la ong da kaba pyni ia shi khung ki kot ba ka la thied.

Nalor ki kot, kane ka iew ka don ruh ki jingialehkai kiba pynsngewtynnad man ka sngi na ka bynta baroh.Ka la don ka jingiakop shna poster na ka bynta ki ki cadet jong ka NCC kiba iashim bynta hynne ka sngi 6 tarik Risaw.

Ha ka 7 tarik Risaw, ka Shillong Book Fair kan don artylli ki jingialehkai na ka bynta ki khynnah, kata ka Swirl & Style: Let’s Write in Cursive! bad ka self-defence workshop da ka Meghalaya Taekwondo Association. Nalor kata kan don ruh ka prokram halor ka Vedic Mathematics bad ki jingshad.