Tuid ki riewngeit Katholik haka Proseshon Iukharist ha Jowai

Syllad | The Rising MeghalayaDecember 10, 2023

Ki paid riew ngeit ka Balang Katholik kila iashimbynta shitrhem haka Proseshon Iukharist ba la pynlong da ka Jowai Parish haka sngi U Blei ha madan Marianhill, Jowai.

Shwa ka jingiaid proseshon, la pynlong iaka jingknia Mass Iukharist Bakhuid kaba la pyndep da u Bishop ka Jowai Diocese u Rev. Ferdinand Dkhar ha ryngkat ka jingiasynran lang ki Lyngdoh Sohblei, ki Sister bad riew ngeit.

Ha kane sngi la don haduh 120 ngut khynnah kynthei bad shynrang kiba pdiang iaka Communion Bakhuid haka sien ba nyngkong eh.

Ha ka nohphai sngi, ki riew ngeit ka Balang ki la shim bynta shongshit da kaba iaid kjat ryngkat ki jingrwai jingduwai ban iaroh ia U Blei.

Ka jingiaid proseshon ka sdang na Marianhill, Iawmusiang, Tpep Pale bad mih sha Mission Compound, Iawmusiang bad pynkut ha madan Marian.

Ha shwa ban pynwai, la ioh ka jingkyrkhu sakrament bakhuid tam ka Duwan na u Bishop u Rev Ferdinand Dkhar bad la ioh ruh ia ka jingkren shaphang ka jingkhraw jong ka Iukharist bakhuid da u Phadar Cresence Roy Laloo.

U Phadar Cresence Roy Laloo haka jingkren ula ong ka jingim Khristan ka shong nongrim haka Iukharis namar dei haka Iukharis Bakhuid ba u don U Blei uba im bad ka Iukharist kadei ka phang pdeng jong ka jingngeit Khristan. Ka Iukharist ka don ar bynta kawei kadei ka Mass Bakhuid bad kawei kadei ka jingleit jngoh iaka Iukharis Bakhuid.

Ula ong ruh ba ka jingmane iaka Iukharist Bakhuid kadei ka dak jong ka jingpynthylli ialade ha U Blei bad ka jinghikai Cathesim jong ka Balang ka ong, ka jingmane ia U Jisu Khrist haka Iukharist Bakhuid, kadei ka jingithuh ia U ba u long U Blei U Kynrad jong ngi.