Tur ki nonghikai SSA sha Secretariat halor ka jingdawa pynkiew tulop

Syllad | The Rising MeghalayaOctober 9, 2024

Ki Nonghikai skul SSA hapoh ka lama jong ka All Meghalaya Sarva Shiksha Abhiyan School Teachers’ Association (AMSSASTA) ha ka 9 tarik u Risaw ki la leit tur paidbah shapoh Secretariat ban pynbor ia ka Sorkar Jylla ba kan pyntreikam noh mardor ia ka jingdawa pynkiew tulop.

Kane ka jingleit tur jong ka Synjuk ka long ban iakynduh ia u Myntri Rangbah ka Jylla u Conrad K Sangma bad u Myntri ka Tnad Pule Puthi u Rakkam A Sangma ba kin tuklar lem halor kane ka jingdawa pynkiew ia ka tulop ba100 percent kaba la shu sahteng mynta la slem bah.

Haba kren sha ki lad pathai khubor, u President ka Association u Bah Peter Thyrniang u la ong, “Hadien ba ngi la poi ha Secretariat, la pyntip sha ngi ba u CM bad u Myntri ka Tand pule puthi kim shym la don. Kumta ngi la iakynduh bad iakren ha kaba iadei bad kane ka mat bad u nongaiktien ka Sorkar Jylla u Bah Paul Lyngdoh.”

“U Bah Paul u la pyntip sha ngi da kaba ong ka Sorkar ka sngewthuh ha kaba iadei bad kane ka jingdawa bad ba na ka liang u Myntri ka Tnad pule puthi u la dep ruh ban aiti ia ka jingai jingmut sha u CM bad ba un aiti biang ia ka jingai jingmut kaba ar jong u na ka bynta ka jingbishar bniah da ka sorkar,” u la ong.

U nongialam ka Seng u la ong ba u Bah Paul u la aijingmut ruh ia ki ba kin iakynduh ruh ia u nongai buit jong ka Tnad pule puthi u Bah HM Shangpliang ha kaba iadei bad kane ka phang.

“Kumta ruh ngin sa leit iakynduh ia u namar u dei u nongaibuit ka Tnat pule puthi bad u tip ruh ha kaba iadei bad kane ka jingdawa pynkiew tulop ka jong ngi,” u la bynrap.

Lah ban kdew ba ki nonghikai SSA ki la pynlong ia ka jingiakhih shong kyllain mungor ba khlem pud ha Madan Malki kaba la kynjoh mynta sha ka sngi kaba khyndai ban pynbor ia ka sorkar ba kan pynkiew noh ia ka tulop jong ki palat 13000 ngut ki nonghikai skul SSA ha ka Jylla.