Tur paidbah ki nongshong dukan madan sha Shillong Municipal Board ba thmu pynkynriah ka Sorkar na Khyndailad

Syllad | The Rising MeghalayaNovember 23, 2024

Ki nongshong dukan madan ha ka thain Khyndailad ha ka 22 tarik Naiwieng ki la tur paidbah sha ka ophis jong ka Shillong Municipal Board (SMB) ban pynpaw pyrshah ia ka jingthmu jong ka Sorkar ban pynkynriah ia ki na kane ka jaka.

Kine ki nongdie madan kila iaid paidbah naduh Khyndailad sha ka ophis treikam ka Shillong Municipal Board (SMB) ban pan jingpynshai na u CEO ha kaba iadei bad kane ka jingthmu pynkynriah jong ka Sorkar.

Na ka liang ka sorkar naduh kine ki bnai kiba la dep ka la pynbna ba kan pynkynriah noh ia baroh ki nongdie madan kiba don kumba 200 ngut na Khyndailad hapoh u bnai Naiwieng namar ka jingthmu ban pynlong ia ka Khyndailad ka jaka iaid kjat jong ki paidbah nongleit nongwan.

Haba kren sha ki lad pathai khubor, ka President ka Meghalaya & Greater Shillong Progressive Hawkers and Street Vendors Association (MGSPHSVA) ka Kong Biolin Pyrtuh ka la ong ba ka kynhun jong ki ka la iakynduh ia u Executive Engineer ka SMB u Bah FB Chyne ban pan jingshai halor ka jingkren jong u Myntri ka Tnad Tourism u Bah Paul Lyngdoh ba ka Sorkar ka la pynkhreh nadong shadong ban pyndkynriah noh ia ki nongshong die madan kiba shong dukan naduh na ka thain Motphran shaduh Khyndailad hapoh ka 24 tarik u Naiwieng.

“U Myntri u la pynmih ia kane ka jingkren wat u la tip bha ba ka don ka Committee ia kaba la thaw ban khmih bniah halor kane ka phang ha kaba ki nongshong dukan madan ruh ki dei ki dkhot ha kane ka Committee. Ngi kwah ruh ia u ba un tip ba lada u Bah Paul u kwah ban long u nongshong dukan madan, ngi pdiang ia u ban wan. Ngin jin da la kmen eh ban pyllait jaka lem na ka bynta jong u,” ka la ong.

Haba pynpaw ba ki nongshong dukan madan ruh ki tip ia ka ain, ka Kong Biolin ka la ong ba une u Myntri u la dei ban kiar ia lade na ka jingkren ka bym don jingkitkhlieh namar ba ma u hi um shym la lah ban leh ei ei halor kane ka phang.

“Kumta ruh, ki nongshong dukan madan kim dei ban sheptieng hynrei ban shaniah ha ngi kiba dei ki dkhot ka Committee namar ngin sa rai halor ki jaka ban pynlong ki jaka shong dukan madan. Ngi kyntu ia baroh ki nongshong dukan madan ba kin leitphai biang sha la ki jong ki jaka die ban bteng ia la ki kam ki jam,” ka la bynrap.

Na ka liang u Myntri u la pyntip dang shen ba ka sorkar ka la dep ban ithuh ia ki laitylli ki jaka ha Khyndailad ban ai jaka shong dukan madan bad kine ki kynthup hapoh ka building jong ka MTC bad ka MUDA.

Haba kylli, ka president ka Seng ka la iathuh ba ka SMB kam don jingtip ei ei ruh ha kaba iadei bad kane ka jingthmu jong ka sorkar bad kam don jingtip ruh halor ki 200 ngut ki nongshong dukan madan kumba la pynpaw da u Myntri. Ka SMB kam don jingtip ia kane lehse ki dei kiba haiing u Bah Paul Lyngdoh, ia kata ngim tip,” ka la ong.

Ha kajuh ka por ka Kong Biolin ka pyntip ruh ba ki don haduh palat 5000 ngut ki nongshong dukan madan kiba ladep pynrung kyrteng bad ka Association.