Twa u lum ha Kharkhana bad Lumpyngngad tap lut ka khyndew iaki jaka rep, duh iaki hajar ki dieng kwai

Syllad | The Rising MeghalayaJune 19, 2024

Ka jingjur slap ha kine ki sngi ba la dep ka la wanrah ia ka jingtwa khyndew kaba shyrkhei ha ka 17 Jylliew 2024 haka shnong Kharkhana bad Lumpyngngad, kiba ha Amlarem Sub Division, West Jaintia Hills District

Kane ka jingjia kala jia haka por 2:30 mynstep. Ia kane la sakhi da ki nongshong shnong kiba sah bri bad la ong ba ka jingtwa ka khyndew ka long thik kumba khynniuh u jumai.

Kane ka jingtwa khyndew ka la pynjulor shikatdei eh ia ki dieng kwai, tympew, synsar bad kiwei ki mar rep.

La thuh ba da ki phew hajar tylli ki dieng kwai ki la shah ban ha ka khyndew bad ki jingthung jingtep kila shah tap lut ha ka khyndew kaba la twa

Ka jingshah ktah ka long kaba jur, khamtam ia ki 8 tylli ki longiing ha shnong Kharkhana bad Lumpyngngad kiba kynthup ia ka kong Embhah Shylla, kong Damayanti Shylladong, kong Akordor Lamare, kong Niti Pamblang, kong Hiltimai Shylla, kong Silent Shylla, kong Nishain Khongmawloh bad kong Miyo Tangsang kaba dei na ka shnong Lumpyngngad.

Ki nongrep kiba shah ktah na kane ka jingtwa khyndew kila pynpaw ka jingbynniaw kaba khraw namar ka jingduh kalong kumba duh ia u dkhot ka longiing kaba syndet syndet.

Kine ki nongrep kiba im ja kpoh na kane ka jaka, ki ong ba ka jingduh jong ki ka long kaba khraw haduh katta katta bad ba ki la duh jingkyrmen ban pynim pat ia ka rep ka riang jong ki.

Ki la kyrpad ia ki bor sorkar naduh u local MLA, montri ba dei khmih ia ka rep ka riang, SDO, BDO Amlarem ban iarap iaki katba lah kloi, khnang ba kin lah ban pyndap pynbiang iaka jingdonkam jingki ha iing hasem bad ki khun ki kti.

Kane ka jingtwa khyndew ka la ktah ruh ia u surok PWD kaba la dap khyndew bad pynsahkut ia ka leit ka wan ki kali. Ha ka 18 Jylliew 2024, por 4:30 janmiet, la phah JCB ban pynkhuid ia ka khyndew na surok. Ki paidbah ki ong ba lada u slap u dang bteng, lah ban don biang ka jingtwa khyndew na ki bynta ba sha khlieh u surok.