Tylli ka Khliehtyrshi ha U CEM JHADC

Syllad | The Rising MeghalayaJanuary 30, 2019

JOWAI: Ka Dorbar Pyllun ka shnong Khliehtyrshi da kawei ka sur kala rai kyrshan tylli ban pynpoi biang ïa u Ma Madonbai Rymbai, Chief Executive Member jong ka Jaiñtia Hills Autonomous District Council (JHADC) kum u MDC jong ka 4-Sohmynting Khliehtyrshi MDC Constituency.

“U Ma Madonbai u dei u riew uba dukhi, hynrei u dei pat u briew uba trei shitom ban wanrah ïaka roi ka par haka constituency baroh kawei”, la ong u Treasurer ka shnong Khliehtyrshi u ma Ram Ryngkhlem haka Dorbar kaba long haka sngi Balang.

“U Madonbai uba la wanrah shibun ki jingkylla ha kane ka shnong, ha ki  khatsan snem kiba la leit ki MLA, MP kim lah ban trei kum ma u bad u la synniang ban tei ïaki skul, pynïoh ki tyllong umbam umdih kiba khuid bad surok kiba la kot da ki klur tyngka tang haka shnong Khliehtyrshi” ong u ma Ryngkhlem.

“Ka roi ka par kan sah kut lada wan da uwei pat u kyrtong ha kane ka shnong” ong u Ma Ryngkhlem bad u kyrtong ban iakhun pyrshah bad u u dei Ma Lakhon Dkhar bad ula kynthoh kumno ngin jied ïa u Lakhon haba ym ju don bynta ha imlang shalang bad uba leh lyndet ïaki jingkut bad ka shnong.

U Waheh Shnong Khliehtyrshi u Ma Kitbok Rymbai ula ong ba ‘Lada ka Khliehtyrshi kan duh ïa u ma Madon kum MDC ka shnong kala ïap”

U Ma Madonbai haba kren; ula ong “Nga sngewsarong ba nga la lah ban kyntiew kyrdan ïaka Khliehtyrshi UP sha Secondary School bad tang naka bynta ban pynbiang ïaka jingduna ka skul  nga la wad ki lad ki lynti ban pynïoh pisa T.50 lak ban pynïoh jingnang jingstad ïaki khynnah kiba wan n aka longïing kaba duk”.

“Ka jingnang jingstad ka dei kaba nga angnud ban kyntiew  namar ba shisien ba la ïoh ka jingnang jingstad ngi lah pyndonkam ha kano kano ka por”, la ong u Ma Madon bad bynrap da kaba ong ‘Nga sngewthuh ïaka jinghiran ka ïoh ka kot u paidbah ha kum kine ki por ba khang ka NGT ïaka jingtih dewiong, hynrei ka jingkhang tih dewiong kam dei kaba neh shilynter bad ka NGT ne ïingbishar ba hakhlieh duh ka Ri ka lah ban plie ïaka jingkhang dewiong lada ngi bud ïaki aiñ kyndon ïada mariang. Kane ka jingkhang tih dewiong kadei ka jingtynjuh ban gin phai sha kiwei pat ki liang ne ki lad kamai”, ong u ma Rymbai.

“Nga ïoh shuki CEM ba ki MDC ki shaniah ïa nga ban ïalam ïaka konsil; phi ki paidbah phim dei ban artateiñ namar ka sap ka phong haka kam politik ka don ha nga naduh ba dang khie samla”, la ong u ma Madon bad lada u wan haka bor khamtam ba ka iing dorbar ka sorkar pdeng kan ai jingmynjur ban pynkylla ïaka Amendment ïaka Sixth Schedule ka konsil kan kham khia haka ïarong pisa bad ki MDC kila lah ban tynrong ka jingkitkhlieh ban kyntiew ïaka roi ka par u paidbah”, la ong u Ma Rymbai.