Tylli ki sengbhalang ban pynlong ka jingkhynra ia ki bar jylla ba wan rung beain ha baroh kawei ka Jylla

Syllad | The Rising MeghalayaJuly 25, 2024

Ka kynhun jong ki phra tylli ki Sengbhalang kiba ialeh pyrshah ia ka jingwan rung kyrthep jong ki bar jylla ki la rai ban iarap ia ka sorkar Jylla ba kan pyntreikam ia ka Meghalaya Residents Safety and Security Act (MRSSA), 2016 da kaba pynlong ia ka jingkhynra ia ki bar jylla ki bym don ia ki kot ki sla kiba biang ha kylleng ki jaka hapoh Rilum Khasi, Jaintia bad Garo.

Ia kane ka rai la shim ha ka jingialang jong kine ki phra seng kaba kynthup ia ka Khasi Students’ Union (KSU), Federation of Khasi Jaintia and Garo People (FKJGP), Hynniewtrep National Youth Front (HNYF), Ri Bhoi Youth Federation (RBYF), Jaintia Students’ Union (JSU), Garo Students’ Union (GSU), Achik Youth Welfare Organization (AYWO) bad Federation for Achik Freedom (FAF) kaba la long ha ka 24 tarik Naitung hapoh ka ophis treikam jong ka Seng FKJGP ha Mawlai.

Hadien ka jingialang, u president ka KSU u samla Lambokstarwell Marngar u la ong, “Ngi la ia rai lang ban iarap lem ia ka sorkar Jylla ia kaba la iohi kumba ka don jingeh ha ka jingduna briew ban pyntreikam mardor ia ka MRSSA, 2016. Kumta ha kine ki sngi ki ban wan, ki kynhun sengbhalang kin pynlong ia ki jingkhynra bad talasi pyrshah ia ki bar jylla kiba khlem kot khlem sal ha baroh kawei ka Jylla.

“Ka sorkar Jylla ka la ialehkai halor ka mat kaba iadei bad ka jingwan rung kyrthep jong ki mynder, bad namar kane ngin iarap ia la sorkar ba kan pyntreikam pura ia ka MRSSA kumba ka long da kaba pynjur ia ki jingkhynra bad talasi pyrshah ia ka jingwan rung beain sha kane ka jylla,” u la ong.

Nalor kata u Lambokstar u la pynkynmaw ba ka MRSSA ka dei kaba la mynjur da ka sorkar Jylla naduh u snem 2016 bad ong, “La thaw ia ka MRSSA namar ka sorkar ka la kren shai ba ka ILP ka dei ka mat jong ka sorkar Pdeng hynrei sngewsih ba ka sorkar kam pat shym la pyntreikam satia ia kane ka ain kaba kongsan.

U la ong ba ka jingkam ba dang shen jong u Myntri Rangbah ka Jylla u Conrad K Sangma ba la pyntreikam ia ka MRSSA ha ka jylla ka dei tang ka jingkren sha ki lad pathai khubor, namar kim shym la don satia ki dak ba kan don kata ka jingpyntreikam ia kane ka ain hapoh madan.

U la ong ruh ba u “U Myntri Rangbah ula kren halor ka District Task Force (DTF) hynrei ki nongmihkhmat jong ki Shnong, kiba leit  iashimbynta ha ki jingialang bala khot da ki Deputy Commissioner, kila pyntip ba ka jingialang ka dei tang ka jingiasyllok ban pyntreikam ia ka MRSSA.

Haba ngi pan jingtip ia ka jinglong ka MRSSA ha ka jingiakynduh ba dang shen, u Myntri Rangbah ula ong ba ka Sorkar ka dang bishar bad ka dang pyrshang ban wanrah ia ki jingpynpynkylla ha u 2020, hynrei kane mynta kala poi sha ka jingbishar jong ka Sorkar Pdeng. Kumjuh ruh ha ka jingialang, u Myntri Rangbah ula pyntip ba kane ka kam ka dang don hapdeng ka jingbishar katba hakhmat ki lad pathai khubor, ula kam ba ka Sorkar kala pyntrei ia ka MRSSA. Ngim tip shuh kano kaba dei.”

“Ngi la pynkynmaw ruh ia ka sorkar halor ka resolution ba pa mynjur da ka Assembly ha ka 19 tarik u Nohprah 2019, kaba kyrpad ia ka sorkar Pdeng ba kan pyntreikam noh ia ka Inner Line Permit (ILP) ha Meghalaya. Hynrei, ha ka por ba wan u Myntri kam Pohiing ka sorkar Pdeng sha kane ka jylla kam shym la mih satia kawei ruh ka kyntien kaba kren halor ka ILP. Haba ngi kylli na ka sorkar jylla ka jubab ka long ba kane ka kam ka dang don hapdeng ka jingbishar. Da shisha ngim lah sngewthuh hangno ka sorkar ka pyrshang ban wad ia ka lynti ban weng ia ka jingeh kaba iadei bad ka jingwan rung kyrthep ki mynder. Kumta ruh kum ki Sengbhalang ngi la kut jingmut bad rai ban pynjur ia ka jingtalasi pyrshah ia ki bar jylla ba wan rung beain bad ban pynlong ka jingkhynra ia kiba khlem kot khlem sla ha baroh kawei ka Jylla” ula bynrap.

Na ka liang u President ka Seng HNYF u Bah Sadon K Blah u la kynnoh ba ka sorkar ka la babe halor ka jingmynjur ia ka MRSSA namar ka la ktah ia ka ‘Vote Bank’ jong ka.

Nalor kata haba pynpaw ba ka Entry-Exit Point bad ki District Task Force (DTF) ki dei ki bynta kiba kongsan tam jong ka MRSSA, ula ong “Ha kaba iadei bad ka Entry-Exit Point, ka Sorkar kala khot ia ka jingialang la bunsien bad ki Sengbhalang bad batai ruh halor ka Impact Assessment, ka jingthied jaka bad ong ba kam da don jingeh than haba phai sha ka kam thied jaka. Ka Sorkar kala kular ba ka jingthied jaka ha Ri-lum Garo kala dep bad ka kam ba thied jaka ka dang iaid ha Ri-um Khasi Jaintia bad ba kala pyndep ruh ia ka Impact Assessment hynrei haduh mynta ka Sorkar kala shukor ba ka Covid Checking Point ka dei ka Entry-Exit Point”.

Kumjuh ula kynnoh ba ka sorkar ka la thok bad pynbiej ia ki nongialam jong ki sengbhalang bad ki paidbah ka jylla, u President ka HNYF ula ong “Ki daw bala ai hi ka long ba ka Sorkar kam lah ban pyntreikam ia ka MRSSA naba ki dang pynkylla thymmai ia ka Act. Kaba thamula ka long, ym pat don shisngi ruh ban pyntreikam ia ka MRSSA, 2016 hynrei kila wanrah da ka Amendment”.

“Lada ka Amendment ka dang shim por, na ka liang ka Sorkar ka dei ban pyntreikam shuwa ia ka MRSSA 2016 lada ka shimkhia shisha ban tehlakam ia ka jingwan rung kyrthep jong ki bar jylla shapoh ka Jylla” ula ong bad bynrap “Nga mynjur ba ka Sorkar imat kam don briew satia ban pyntrei ia ka MRSSA. Kumta, ngim don lynti da kumwei pat hynrei ban iarap ia ka Sorkar ba kan pyntrei ia ka MRSSA khnang ban lah pyrrkhing ia ka jingrung kyrthep ki briew kiba na bar shapoh kane ka jylla.