Tylli mlon u paidbah ka kur ban dawa pynkut iaka raibi u Tellme I Love You & ka kynhun

Syllad | The Rising MeghalayaSeptember 4, 2022

Ka jingjia shah pyniap ki ar ngut ki nongniah kali ha rilum Jaintia ha u bnai bala dep, kala wanrah iaka jingtylli u paidbah ka kur ban dawa na ka bor jong ka aiñ ban pynkut iaka raibi da kaba pynshitom da kaba tyngeh ia ki nongpyniap kiba la kem da ki pulit jong ka Jowai.

Kine ki suba nongpyniap briew ki dei u I Love You Talang, Ramesh Dkhar, Tellme bala tip ruh kum u Bor Pyrtuh bad u Sampher Ksoo. Kine ki saw ngut la suba jur ba ki la pyniap ia u Fullmoon Kharsahnoh uba niah kali Jowai Shillong bad uwei pat u nongniah kali dei Damehipaia Papeng uba kamai na Jowai Ladrymbai Khliehriat kaba la jia ha u bnai Nailar.

Hadien ka jingiohkem ia kine ki snar pyniap briew kila phla bad la lap ruh iaka metiap u Damehipaia. Ka met jong u Fullmoon la lap na Mynkre hajan ka surok ban leit sha Amrit Cement, East Jaintia Hills. Ia ka met u Fullmoon la lap bad suba jur ba ki runar kila teh iaka kti ka kjat bad ot ia u ryndang da ki kynja tiar ba nep haduh bad ula khlad ha kane ka jaka na ka jinglyngkein ka snam.

Ka synjuk ki nongniah kali ha Rilum Jaintia kaba kynthup Jowai-Shillong-Guwahati Tourist Cab Association, All Jaintia Commercial Vehicle Association (AJCVA) kaba la snohktilang da ka Synjuk ki Waheh Shnong Ri Jaintia, Synjuk Waheh Shnong Jowai, JLKTTA nalor ki sengbhalang kila dep pynlong iaka peace rally ban dawa naka bor jong ka ain ban pynshitom da ka set byndi shi jingim ne ban sdien phasi ia kine ki runar pyniap briew.

Shuh shuh haka sngi Saitjain ka dorbar shnong Moorap, ka shnong trai u I Love You Talang bad ka kur Talang bad ka JAC jong ka Mynsngat-Khanduli Area kila mih paidbah ban pyrshah bad pynrem ia kine ki saw ngut ki runar pyniap briew kiba don suh ka jingtip lem iaka mynsiem kiba lui lui tang ban ioh iaka spah shisngi.

“Wat la u dei u kur u kha ne u para shnong para thaw, para marjan marpa hynrei ïa u ngi pynrem namar u kheiñ kum mynsiem mrad ïa mynsiem briew kumta ïa u, la dei ban sdien phasi khnang ban kut noh kane ka raibi,” ong ka ba haïing ba hasem jong u I Love You Talang bad ki nongïalam jong ka Dorbar Shnong Moorap.

Ka Dorbar Shnong Moorap kynthei bad shynrang ryngkat ki placard ki la mih da u Shnong sha ka rally ba la khot pynlong da ka JAC jong ka Mynsngat-Khanduli Area ban pyrshah ïaki kam runar u I Love You Talang ha Mynsngat.

“Ngi kyrshan ïaka jingdawa jong u paidbah ba bun ba lang ban set byndi shirta jingim bad sdien phasi ïa I Love You Talang”, la ong u Waheh Shnong ka Moorap u ma Stanly Ryngkhlem.

Ula ïathuh ba u I Love You Talang ka trai shnong jong u kadei na Moorap bad mynta la San snem une u I Love You um poi Shnong shuh bad ka shnong hynrei haki khyndiat taïew u mih pynban kum u nongpynïap briew.

“Ngi la sngewlehraiñ namar kat shaba ngi leit kat shaba ngi wan, ka neh ka nam ba ki nong Moorap kidei ki nongpynïap briew bad kum ka shnong ngi sngewsih haduh katta katta bad ngim lah ban pdiang kum une u briew ba un don hapoh ka shnong ka thaw namar u buh jingma ïaka leit ka wan haka imlang sahlang”, la shuh shuh u Waheh Shnong.

U Secretary Shnong u Ma Thadius Phalangki ula ong, ka shnong ka sngewsih ban don kum une u jait briew na kane ka shnong bad haka jingshong Dorbar ka shnong ka rai ban pyrshah bad pynduh pyndam ïa kum kine ki jait briew kiba pynsniew dur ïaka imlang sahlang.

Ula ai ka jingai khublei kyrpang ïaka tnad pulit kaba la trei shitom ban ïoh kem ïa u I Love You. “Da ka jingïoh kem ïa u (I Love You) ki khun ka shnong ki sngew tngen ka mynsiem haka leit ka wan.

Na ka liang ka ba haïing jong u I Love You ka la ong, kum ka Kur ngi pynpaw ka jingsngewsih kaba khraw haduh katta katta bad kum ka ïing ka sem ngi pynrem ïa une u riew runar (I Love You) uba shim ïaka mynsiem ba lui lui.

Ka JAC kala pynlong ia kane ka rally ha Mynsngat namar ba ka shnong kine ki briew ruh ki dei na katei ka thain, lait noh u Ramesh Dkhar uba na Tongseng. U I Love You Talang ka shnong jong u ka dei na Moorap, u Tellme ne u Bor Pyrtuh na Namdong bad u Sampher Ksoo.

Kane ka jingïaid paidbah ka sdang ha Lad Umladang-Khanduli bad la pynkut ha Mynsngat kaba la iahsimbynta da u ki nongialam shnong, ki sengbhlang, ka synjuk niah kali bad u paidbah na kylleng ki shnong.

Baroh ki nongkren da kawei ka sur ki la dawa ïaka jingsdien phasi ne set byndi shirta jingim ïa kitei ki riew thrang snam bad daleilei kimdei ban ïoh jamin namar ki long ka jingma kaba khraw ïaka imlang sahlang.

Ka jingleh jong kine ki riew thrang snam ka pynsyier ïaka ri bad ka jaitbynbriew khamtam ki nongshong shnong sha kane ka thaiñ ki bym juh don ka jingtieng jingsyier hynrei dang ha kine ki khyndiat taïew mih pynban kum kine ki jait briew kiba la ïap ka mynsiem ïatip lem, la ong u Damian S War Waheh Shnong Namdong.

Ha kane ka rally la phah ruh iaka khubor sngewlem sha ka longing kine ki arngut ki lanot kiba la duh ei iaka jingim.