Tyngkrein paw ka Lumshnong C&RD Block tang ka nam, hap sangeh ki VEC ban trei bym ioh pisa skim bylla 100 sngi

Syllad | The Rising MeghalayaSeptember 2, 2024

Wat hadien shisnem bala plie paidbah iaka Lumshnong C&RD Block, hynrei kane ka block kam lah satia ban treikam pura bad ka kylla long tang ka nam ha kaba haduh mynta ka dang hap hapoh ka jingpeit u BDO jong ka Wapung C&RD Block

Kane kala paw tyngkrein hadien ba ki Village Employment Council (VEC) bapher bapher kim ioh iaka bai tiar ne material cost bad mynta u snem kila shim iaka sienjam bad rai sangeh ban pyntrei iaka skim bylla 100 sngi ne ka MGNREGS.

U kyrwoh bala pyllait da ka VEC Association kiba don hapoh Lumshnong C&RD Block, kala pynpaw ba ka Lumshnong C & RD Block kaba dang hap hapoh ka jingkhmih jong ka Wapung C & RD Block ka la shah leh bym khein snep ha u BDO jong ka Wapung Dr. T. Shylla.

Ka VEC Association kala kynnoh ba une u BDO um shah ia ki VEC kiba don hapoh ka Lumshnong C & RD Block ban pynrung ia ki materials bill jong ki, hadien ba ki la dep pyntrei ia ki projek MGNREGA hashuwa ka Financial Year 2023-2024. Wat hadien kane ruh, um shah ia ki materials bill jong ki shnong bapher bapher ba don hapoh Lumshnong C & RD Block ban submit ia ki Utilization Certificate (UC) sha ka Wapung C & RD Block.

Ki VEC jong ka Lumshnong C & RD Block ki la kylli na utei u BDO halor ka jingbym shah ban pynrung ia ki material bills jong ki, hynrei ka jubab kaba ki ioh na BDO ba dei na ka State kaba bym shah ban enter ia ki bills jong ki.

Hadien ka jingiai shah kaba daki snem, ki nongkitkam jong ki VEC Lumshnong C & RD Block Association ha ka 27 tarik Nailar, 2024, ki la leit ban ia kynduh ia ka Joint Mission Director jong ka State Rural Employment Society (SRES), ka Kong I Diengdoh.

Ka la pynshai ba kam don kano kano ka ain kaba khanglad ban enter ia ki material bills jong ki VEC ha ka Lumshnong C & RD Block bad kaba kham lyngngoh ka long ba ym shym la pynkynriah ia ka Lumshnong C & RD Block na ka Wapung C & RD Block.

Ka Joint Mission Director ka la iathuh ba ka bai materials jong baroh ar tylli kine ki Block kaba duna  kumba haduh T.15 klur la dep ban pyllait ha ka Financial Year 2023-2024, bad ka Lumshnong C & RD Block ruh la mang kyrpang namar ba dang dei ka Block ba thymmai.

Ka Association ka pynpaw ka jingsngewnguh ia ka sorkar jylla namar ka jingpyllait ia katei ka pisa. Ka jingeh kalong ba kane ka jingleh BDO ba um shah wat tang ban enter ia ki material bills jong ki VEC kiba don hapoh Lumshnong C & RD Block, kala khanglad iaki VEC ban pyntrei ia ka MGNREGA kaba ai jingmyntoi sha ki thain nongkyndong. Ki don ruh ki VEC kiba sahteng ka bai materials naduh u snem 2021-2022, 2022-2023 & 2023-2024.

La kynnoh ba na ka daw ka jingleh shilliang une u BDO ka la pynlong ia ki VEC ban rai ban sangeh shwa ban trei ia ka MGNREGA ha u snem 2024. Ka Association ka la iathuh ruh ba une u BDO ym ju khot meeting ia ki VEC kiba don hapoh Lumshnong C & RD Block, kaba la buh jingeh ia ki shnong ban pyniaid beit ia ki jingtrei hapoh ka Block.