Tyngshain ka samla na East Jaintia Hills haka iakop niah cycle haka Meghalaya Games

Syllad | The Rising MeghalayaJanuary 19, 2024

Tang ha ka rta kaba 21 snem ka samla Phyrnai Kyndait, ba shong ba sah ha East Jaintia Hills bad kaba dang pule ha ka 4th semester Bachelor of Arts, ka la tyngshain ha ka jingialehkai niah cycle ha ka lympung jong ka 5th Meghalaya Games ha Tura.

Ka jingieid jong ka Phyrnai ban niah cycle ka la mihpaw naduh ba dang rit ha ki por ba ka dang niah tang da I cycle lai shaka bad nangne in sa kiew ha ka jingialehkai. Ha u snem 2022, I la ioh ia ka lad ban iakhun nyngkong eh ha kawei ka lympung ba la pyniaid da ka West Jaintia Adventure Cycling Association ha Jowai.

Ha kane ka lympung, ka la ioh ban khur ia ka jingjop bad ka la lah ruh ban poi ha ka thong niah cycle na Jowai shaduh Amlarem bad kam sangeh tang hangne hynreo ka la kiew ruh ha ki kyrdan ba shajrong wat ha Mawkyrwat ba la pyniaid da ka Meghalaya Cycling Association.

Ka la ioh ban mihkhmat ruh ia ka jylla Meghalaya ha ka jingiakop jong ka MTB Tawang National CFI kaba la pynlong ha Tawang, bad hangne I la ioh ban khur ia ka takma ksiar. Ka jingiaid lynti jong ka samla Phyrnai Kyndait na I nongniah cycle ba paw tang ha shnong, da ka jingtrei shitom I la long ruh I nongniah cycle wat ha satlak ka pyrthei.

Ha u snem ba ladep, ka la iakhun ha ka 4th Meghalaya Games bad ka la jop ha ka kyrdan ba ar, bad mynta u snem ha ka 5th Meghalaya Games, ka la ioh syndon ban khur ia ka takma ksiar ha ka jingiakhun jong ka XCO women open category/Mass start.

Ka samla Phyrnai ka la ai khublei ia ki kmie ki kpa, bahaiing hasem khamtam ia u hynmen uba ju ai mynsiem ia ka ha ka jingiaid lynti kum ka thei ialehkai.  U hynmen jong ka, uba dei ruh u nongniah cycle, u long u paia baskhem na ka bynta ka samla Phyrnai bad dei lyngba ka cycle u hynmen ka sa jop ia ka thong.

Ka samla Phyrnai kam ju phai dien na ki jingeh bad jingjynjar bad haba ai jingkren ka la ong ba lada ka leit Shabar ban iakhun ha ki rynsan, ka ju kynduh ia kiwei pat ki para nongialehkai ba kham tbit,  bad lada ia nujor, ki kham biang ki tiar ki tar ban ia ki cycle ba na shane bad haba ka wan na ka longing kaba sngewrit, ka long ka jingeh ia ki ban ioh ia ki cycle kiba biang ki tiar ki tar namar ki la kham rem.

Khlem kano kano ka jingshah hikai, ka ju iaid marwei ha ka jingim kum ka thei ialehkai niah cycle bad ka ju niah kai tang bad ki paralok, bad man la ka step ka ju mareh step kumba 5-10 kilometer bad ka ju niah cycle man ka step bad por janmiet kumba 2 kynta eiei.