Tynkrein lap ka KSU ba phiel ka Lumshnong Sub Station lip bording khah khah

Syllad | The Rising MeghalayaApril 25, 2022

Ka Khasi Students Union (KSU) Narpuh Circle kala lap tynkrein tynkrein ba phiel ka treikam ka Sub Station ha Lumshnong kaba la pynlong iaka thain Narpuh baroh kawei ba duh bording khah khah mynta la bun bun snem.

Ka KSU kaba la leit jurip ia kane ka sub station kaba don ha Lumshnong haka sngi Saitjain, kala lap ba kane ka sub station kala dkhoh ban treikam namar ba ka pyndonkam wat iaki tiar ki bym long shuh bad dei kane ka daw ba wat la slap ne rang ka suibneng ka Narpuh ka shah ktah haka jinglip bording.

La iathuh ruh ba kane ka sub station ha Lumshnong ka don tang ar ngut kin linemen ban peit ia katei ka thain, kaba buh jingeh iaki ban ai iaka jingshakri kaba pura ia u paidbah.

Ki dkhot ka KSU kila ioh ruh ka lad ban iakren bad ki nongtrei kane ka sub station bad kila pyni ia u transformer bad sniaew bad iathuh ba ki don shibun ki jingduna. Ki nongtrei kane ka sub station kila iathuh haka KSU ba don ruh u transformer bym don Silica, ba pei ka umphniang bad kila donkam kyrkoeh bad bujli.

Namar kane ka jingdkoh treikam ka Lumshnong Sub Station kala pynthud ruh iaka jingsam bording ha Kuliang bad Tongseng sub station.

Ka KSU kala kynnoh ba ka sorkar kala leh bein shaba plat iaka thaiñ Narpuh namar ba MeECL pyndonkam da ki tiar condemned bad halor kane ka KSU kala kyntu iaka MeECL ban pynbiang iaki jingdonkam baroh khnang ba akne ak substation kan  ai jingmyntoi ia u paidbah ka thain kiba la shah ktah haka jingduh bording.