Tynrong jingkitkhlieh hi u paidbah ban shna ïaka surok ban rung shapoh dong ha Jowai

Syllad | The Rising MeghalayaDecember 19, 2020

Ki paidbah nongshong shnong ka dong Khliehrymphum kaba hap hapoh u pud u sam ka Dorbar Shnong, Ladthadlaboh kaba don shadien ka Polytechnic Jowai kila tynrong halade iaka jingkitkhlieh ban shna surok khyndew ban rung shapoh kane ka dong haka sngi Saitjain.

Ki samla shynrang bad ki rangbah ki la ia mih paidbah ban shna hi ia kane ka surok kaba ia khlad na ka surok Kiang Nangbah – Dulong Road shapoh katei ka dong.

La shna ïa ka bynta ban rung shapoh katei ka dong namar ka jingsniew kaba la palat liam. La pyndonkam da ka dewbilat, shyiap bad mawria bad ia ka jinglut baroh la synniang da ki nongshong shnong ka dong.

U rangbah dong u ma Stranger Lamare uba la lamkhmat ia katei ka jingtrei ia kane ka surok u la  ai khublei ia baroh ki dkhot jong ka dong kiba la noh synñiang bad ki ba la mih paidbah ruh ban iatreilang ban siang dewbilat iaka surok.

Kane ka surok shnong ka don kumba 3 km tam ka lynter bad kala sniew shaba palat khamtam eh ha ka por lyiur ba jur u slap. 

Na ka liang u ma Stranger u la iathuh ba na ka liang ka dong ka la dep ai jingthoh sha u local MLA ban kyrpad ia u ban pynioh skim na ka sorkar ban shna iaka surok bad u don ka jingkyrmen ba u Local MLA un sa shimkhia ban pynioh surok rong ha kane ka don na ka bynta ban suk ki paidbah nongshong shnong jong katei ka dong.