Tynrong u paidbah halade iaka jingkitkhlieh ban maramot iaka surok haki shnong khappud ha East Jaintia Hills

Syllad | The Rising MeghalayaAugust 1, 2023

Barabor ngi ong ba ka surok, u dei u shabi jong ka roi ka par hynrei namar ba ki bor ba dei peit kila lehklet iaka surok kaba pyniasoh ia bun tylli ki shnong hapdeng ka East Jaintia Hills District bad West Jaintia Hills District bad kumjuh kaba hap ha ki thain khappud India bad Bangladesh kala pynlong ia u paidbah nongshong shnong ban tynrong halade iaka jingkitkhlieh ban shna hi iaka surok kaba la iehshrah la bun bun snem.

Kane ka surok ka dei kaba la tip kum ka Rymbai-Bataw- Borghat-Jalalpur Road.

Kane ka surok lada ka long jyllih ban iaid kali naduh ki kali rit haduh ki kali heh, ka pyniasoh iaka East Jaintia Hills bad West jaintia Hills lyngba ka jingkieng Borkhat, kaba la dep ban shna ha u snem 2019.

U syllad.com uba la hiar sha katei ka thain, ula lap ba kane ka surok ym lah shuh ban niew iaka kum ka surok bad kam don shuh ka rong bad kala long thik kum ka surok khlaw, kaba la pynduh iaka hok jong ki nongshong shnong bad ki hap ban im iaka jingim hapdeng ka jingsyrtok ban iaid ha kane ka surok mynta la 17 snem kynthih.

Kane ka thain ka long kaba kham kyndong bad sahdien ha ki bynta khappud ka India bad Bangaldesh tang namar ba sniew tasam ka surok naduh ka shnong Lama shaduh Borkhat bad kiwei kiwei ki shnong.

Ki paidbah ka thain kaba kynthup iaka shnong Borkhat bad Natbor namar ba ka jingiakynduh mawsiang haka leit ka wan kila mih paidbah ban trei hi iaka surok kumba 11 KM ban pyndap da ki maw bad khyndew ha ki thliew ki syar ban kham pynsuk iaka leit ka wan bad ban pynpoi iaki mar rep mariang jong ki shnong na katei ka thain naduh Lama Borkhat haduh Natbor, Kwator bad kiwei kiwei.

Haba iakren bad u waheh shnong Borkhat u Kyrmen Swer ula ong, kaba pynlong iaki ar shnong ban tynrong halade iaka jingkitkhlieh ban maramot ia kane ka surok, kadei hadien ba ki mad iaka jingsohsat haka iaid ka ieng, ka kit ka bah khamtam haka pang ka shitom bad haka por lyiur ba jur u slap bunsien ki kali kim ju lait shuh ban ïaid namar ba ka la jur sa tang ka jyrsieh, ka thliew ka syar bad kaba la buh jingma ruh ïa ka jingim briew.

Ula kyrpad iaka sorkar bad ki nongthaw aiñ ban phai khmat sha katei ka thain ban pynjem iaka jingeh u paidbah khnang ka jingdon ka surok kan wanrah jingmyntoi ia u nongshong shnong.