Tyrwa ka HSPDP ban kynthup lang ia ka 80% ka bhah na ka bynta ki Khasi, Jaintia bad Garo

Syllad | The Rising MeghalayaJune 26, 2024

Ka Hill State People’s Democratic Party (HSPDP) ha ka 25 tarik Jylliew, ka la pynpaw halor ka jingdonkam ban kynthup ne kyllum lang kajuh ia ka bhah thungkam thungjam kaba 80% na ka bynta ki paid Khasi, Jaintia bad Garo khnang ban iada na ka jingkhanglad ne niewbein ia kano kano ka jaidbynriew.

Ha ka dorkhas ba la phah sha ka Expert Committee halor ka Reservation Policy, u president ka HSPDP u Bah KP Pangniang u la ong ba ka long kaba donkam ban bishar bniah biang ia ka Reservation Policy jong ka 12 tarik u Kyllalyngkot 1972 na ka bynta ka roi ka par ha ka liang ka thungkam thungjam da kaba khmih bniah ruh halor ka jingdon ia ki kynhun jaidbynriew bapher bapher ha ka imlang sahlang.

“Ka party ka don ia ka jingsngew ba dei ban shim kyllum lang noh hajuh ia ka 40% + 40% ka ban long baroh 80% na ka bynta ki Khasi-Jaintia bad Garo khnang ba kan don ka jingialeh bad ka jinglah katkum ka jingwan shakhmat hapdeng ki dkhot jong ki paid riewlum ka Jylla, kata ki Khasi-Jaintia bad Garo, bad ka ban khanglad ruh halor ki jngniew bein ia kano kano ka jaidbynriew,” ong u Bah Pangniang.

Nalor kata haba kdew ia ka Office Memorandum jong ka 18 tarik Nohprah 1972 halor ka jingbhah ia ki kam hapoh ki District Level, u President u la ong, “Ka Seng ka aijingmut ba 90% dei ban ailad shwa ia ki trai shnong jong kano kano ka district ha Meghalaya, kata da kaba buh jingmut ba ka jingthungkam ha Khasi -Jaintia Hills district ka dei ban long tang sha ki paid Khasi bad Jaintia, katba ka jingthungkam ha Garo Hills District ka dei ban long tang na ka bynta ki paid Garo.”

U la ong ba ka Seng ka aijingmut ruh halor ka jingdonkam ban pynduh noh ia ki sienjam ‘carry forward’ lane ka jingrah sha u snem ban wan lada kano kano ka jaidbynriew kam lah ban pyndap ia ka bhah thungkam.

“Ha ka para 2 jong ka resolution kaba ong, “Lada ka don ka jingduna ha ka jingdon ki kyrtong na ki Scheduled Tribes bad Schedule Caste ki ban shimti ia ka kam kumta ruh yn rah noh ia ki kam kiba thylli sha ka jingpynrung kam ha u snem uba bud, hynrei kam dei ban palat ia ka shi snem. Ka party ka aijingmut ruh ban pynduh noh ia kane ka bynta,” ong u president.

U Bah Pangniang u pyntip ruh ba ka party HSPDP ka la ai ia ka jingtyrwa sha ka committee ba kan bishar biang ha kaba iadei bad ka jingpyntreikam ia ka State Reservation Policy halor ka jingbhah ha ka liang ka pule puthi.

“Naduh ba la ioh ia la ka jong ka Jylla Meghalaya, ka State Reservation Policy jong ka 12 Kyllalyngkot 1972, la pyntreikam ruh ia ka percentage ha kaba iadei bad ka bhah pule ha ki bynta bapher bapher na ka bynta ki Khasi, Jaintia bad Garo. Kane ka long ruh khlem kino kino ki section ne clause kiba biang ki ban batai shai ha ka Reservation Policy, kumta ka Seng ka sngew ba ka long kaba donkam ban khmih bniah biang halor kane ka bynta,” u la ong.  

Shuh shuh une u president ka party u la ong ba namar ba kane ka mat ka dei kaba iar bad kyllain kumta na ka liang ka Sorkar ka dei ban shimkhia bha khnang ba kane ka mat kan ym pynthut ia ka shongsuk shongsain ha ka imlang ka sahlang bad ka jylla hi baroh kawei.

“Watla kine ki jingai jingmut ki long tang khyndiat hynrei ka seng ka khmih lynti ba kan don ka jingmih kaba seisoh bad kaba bha na ka jingaijingmut jng ka committee ba la thaw da ka sorkar,” u la bynrap shuh shuh.