Tyrwa ki lai ADC ban pynioh ia ka song pisa kaba T.8877 klur na ka bynta ki san snem

Syllad | The Rising MeghalayaOctober 1, 2024

Ki laitylli ki Autonomous District Council (ADC) ha ka 30 tarik Nailur ki la tyrwa ia ka grant na ka Sorkar Pdeng kaba kot sha ka T.8877.51 klur na ka 16th Finance Commission na ka bynta ki san snem ban wan.

Haba kren sha ki lad pathai khubor, u CEM ka KHADC u Bah Pyniaid Sing Syiem u la ong, “Na kine, ka Garo Hills Autonomous District Council (GHADC) ka la tyrwa ia ka song kaba heh tam kaba kot haduh T.5042.30 klur, ka KHADC kala tyrwa T.2,641.54 klur bad ka JHADC kala tyrwa T.1,019.60 klur.

U la ong ruh, “Ym kumba long ka 15th Finance Commission, ki la ai kham bun ka Tied grant. Ka jingmut ka long ba ki la phiah ia ka Tied grant ia kaba yn pyndonkam khamtam na ka bynta ki project kiba iadei bad ka um, ka koit ka khiah bad ka khuid ka suba. Ha ka jingshem ka jong ngi ka long kaba shitom bha lada ki dang phiah ia ki song pisa na ka bynta ban pyndonkam. Ki don ki bynta ha kaba ngi donkam ia kiwei pat ki project na ka bynta ki kam pynroi ia ki skul, college lane ki jingtei ha ki shnong ki thaw lane kiwei pat. Khnang ban ym iatyngkhuh bad kiwei pat ki project kam pynroi, ngi la aijingmut bad kyrpad ia ka 16th Finance Commission ba kan kham pynjynsur ia ka Untied Grant khnang ba ngin lah ban pyndonkam ruh ha kiwei ki kam pynroi ba la tyrwa da ki nongialam shnong lane ki Nokma ne Elaka.”

Nalor kata u CEM u la pyntip ba ki ADC ki la kyntu ruh ia ka Commission ban pynthikna ba ka song jingiarap pisa na ka Sorkar Pdeng sha ki ADC ka dei ban long lyngba ka Ministry for Development of North Eastern Region (DoNER) lane ka North Eastern Council (NEC) bad ym lyngba ka Ministry of Panchayati Raj (MoPR).

Kumjuh haba pynpaw ba ki ADC kila shah ktah jur na ka jingkhang jong ka NGT ia ka kam tih dewiong ha Jylla ha kine ki 10 snem bala leit noh, u Bah Pyniaid ula ong ba kila kyrpad ia ka Commission ban ai jingmut ha kaban ai grant lem ban pyniaid ia ki kam ki jam ba manla ka sngi jong ki Council hapoh ka Revenue Deficit Budget grant ka Sorkar Pdeng.

“Ngi la pyntip sha Commission ba baroh ki lai ADC ki shaniah ha ka bhah khajna na ki marpoh khyndew kum u dewiong (Ngi ioh kumba 25% na ka 100%). Hynrei naduh ba khang tih dewiong, ka JHADC bad ka GHADC kim shym la lah shuh ban siew ia ka tulop jong ki nongtrei, bad kane ka la ktah jur ia kine ki artylli ki ADC. Kumta ngi kyrpad halor kane ka mat hakhmar ka Finance Commission bad ngi la kyntu ba kan aijingmut lem na ka bynta ban pynioh grant na ka bynta ka jingtreikam jong ki council,” u la ong.