Tyrwa pynrung iaka Wah Myntdu haki kot pule, khot wer ka KYKWM ban iakhun iaki jaboh plastic

Syllad | The Rising MeghalayaFebruary 9, 2022

Ka Sein Khooid Ya ka Wah Myntdu (KYKWM) kum kawei na ki seng ba ïeng ban trei na ka bynta ka miat ka bha ka sawdong sawkun jong ka Wah Myntdu kala khot wer ia u paid nongshong shnong ka rilum Jaintia ban iakhun pyrshah iaki jaboh plastic ban iada iaka wah Myntdu bad ka mei ramew.

Ki nongialam ka KYKWM ba kynthup ia u Khroo Lamsalanki Pariat president, u Dapherborn N. Suchiang general secretary, u Bichar Shylla vice-president, u Oriland Shylla treasurer bad ka Hunbeit Dkhar assistant general secretary haba kren sha ki lad pathai khubor ha iing dorbar jong ka Chilliangraij haka sngi ba ar, kila pynpaw iaka jingsngewnguh ia u Deputy Commissioner, West Jaintia Hills uba la pynmih iaka jingpynbna ban pyrkhing iaka jingpyndonkam iaki plastic bun rong bad ki tiar plastic kiba lah ban pyndonkam tang shisien katkum ka Plastic Waste Management (Amendment) Rules, 2021, kaba la khang pyrshah ban shna bad ban buh stock kumjuh ban iadie iathied naduh u 1 tarik Naitung 2022.

Nalor kata ki plastic ki bym bit ban thain ban thaw pla iew kiba la tip kum ki Non-Woven plastic bad kiba duna iaka jingkhia 50 Gram per Square Meter (GSM) naudh 30 tarik Nailur, 2022.

U Khroo Lamsalanki Pariat haba kren ula ïathuh, kumba ka thong jong ka seng ka long ban ïada bad pynneh pynsah ïaka jingkhuid jong ka wah Myntdu kum ka wah ba ai jingmyntoi shibun ïaka shnong Jowai bad ïa kiwei ki bynta ka Ri Jaintia. Ula ong ba ha kane ka kynti hadien ka jingïohi ïaka jingjyllei ki plastic kat shaba ïaid ba ïeng khamtam ha shilynter ki bynta ka wah Myntdu, da kawei ka sur kila shim da ka sienjam ba tyngeh ha ka jingïadei ban khanglad ïaka jingpyndonkam ïaki plastic naduh na ïing na sem ha ki ïew ki hat bad ha kino kino ki jingïalang paidbah da kaba ïaid ryngkat bad ki kyndon ne ki aiñ ba la buh da ka sorkar.

Shuh shuh u la iathuh ruh ba ia ka Wah Myntdu la ithuh ruh da ka Sorkar India kum kawei na ki wah ba kyrpang kyntang ka Ri Jaintia, bad ha kaba iadei bad kane ka synjuk da ka jingsngewkhia kala buh ruh ka jingtyrwa ki bor ba dei peit ia ka tnad pule puthi hapoh ka Jylla ba kan pynrung ia ka Wah Myntdu ha ka subject ba iadei bad ka mariang khnang ba ki khynnah pule ka Jylla kin tip bad bna shaphang jong ka kum ka wah ba don shibun ki khana ki parom.

Kiwei kiba kren ki dei u Ma Bichar Shylla, u Oriland Shylla bad kila kyntu ia u paidbah ban iakhun pyrshah iaka jaboh plastic ban iada iaka sawdong ka mariang.