U-19 Men’s Cooch Behar Trophy: Tied u Gaurav 95, kamai ka Meghalaya 239r run pyrshah iaka Delhi

Syllad | The Rising MeghalayaNovember 21, 2024

U Gaurav Narleng u kylla long u shot shan bah ia ka kynhun ialehkai jong ka Meghalaya ia kaba u la duh salit wat ban kamai ia la ka jong ka spah ron (century) ka jong u, kane ka la jia ha ka sngi kaba nyngkong jong ka lympung ialehkai ka their U-19 Men’s Cooch Behar Trophy Elite Group A hapdeng ka Meghalaya pyrshah ia ka Delhi,ba la long ha madan ialehkai ka MCA ha Polo haka 20 tarik Naiwieng.

Ha kane ka jingiakhun, ka Meghalaya kaba la wan ba kan tied nyngkong ka la lap ba hap kynsan bun tylli ki wiket kiba shakhmat, kaba pynlong ia u Narleng ba un hap ban mih hakhmat ban tei ia ka nongrim kamai ron kaba khlaiñ ia la ka jong ka kynhun, ha kaba u la lah ban kamai 95 ron kaba la wan na ki 171 tylli ki bol, ha kaba u bynrap lang 19 tylli ki four.

Ka khana jong kane ka jingiakhun ka long ba k Meghalaya kaba la jop ia ka jingkynting pisa ka la kam trai ba kan ba kan tied nyngkong bad tad haduh ba la pynkut ia ka sngi, ka la lah ba kan kamai 239 ron hadien ba ka la hap noh 7 wiket na ki 98 over.

Kumba la kdew haneng, ka Meghalaya ha kaba sdang ka la don hapdeng ka khim khiat hadien ba ka la lap ba hap kynsan haduh saw wiket naka bynta 44 ron nangta 75 ron naka bynta 5 wiket, pynban ka jingakamai ron paralok  (sixth wicket partnership) hadpeng u Gaurav bad u Kshitij Singhania (52 not out), ka la lah ba kan pynskhem ia ka jingkamai ron ka Meghalaya, hadien ba kine ki arngut ki la sei madan ia ka jingkamai ron ralok kaba haduh 86 ron, ha shwa ba u Gaurav un out noh ha ki kti jong u Dhanya Nakra (1/19).

Katba na ka liang ka jong u Kshitij 52 ron kaba u la kamai ka wan hadien ba u la bynrap lang bad ki hynniew tylli ki four na ki 202 tylli ki bol, kaba u la lah shuh shuh ban iai bteng ban seng ia ka jingkamai ron paralok kaba sa 54 ron bad u Angkit Tamang (22 not out).

Naka liang ki nongkawang bol ka Delhi, u namtam jong kane ka sngi ba nyngkong dei u Udhav Mohan uba la ioh ban khur 3 wiket naka bynta 72 ron

Kane kan dei ka sien iakhun kaba lai ia ka Meghalaya ha kane ka lympung, ha kaba ki artylli ki jingiakhun ba ka la dep shakhmat ka la mad ia ka namrem kaba heh bha hakhmat ka Chandigarh bad Odisha, kaba lada ia nujor pat ha ka jingiakhun pyrshah ia ka Delhi mynta ka sngi, lah ban ong ba ka la don ka jingkiew pat katta ka rukom ialehkai jong kane ka kynhun.

Lada phai pat sha ka kynhun ialehkai ka Delhi ka la lah ba kan jop shisien bad shah rem kawei.