U Badonkupar Synnah uba nyngkong ban jam sha kawei ka wat na Meghalaya haka 7th Elite Men’s National Boxing Championship

Syllad | The Rising MeghalayaNovember 26, 2023

U Badonkupar Synnah ula kylla long u rang iakura ba nyngkong eh na Meghalaya ban jam sha kawei pat ka wat hadien ba ula khur jingjop haka 7th Elite Men’s National Boxing Championship” kaba la long haka 26 tarik Naiwieng ha SAI Indoor Hall, Shillong

U Badonkupar Synnah ula jop ia u Roopesh Shukla na Madhya Pradesh haka jingiakhun haka kyrdan light welterweight 60-63.5 kilo. Kane ka jingiakhun kala pynhun ia ki paidbah nongkyrshan kiba la wan ban sakhi ia kane ka jingiakura.

Ia kane ka lympung iakura ka ban kut ha ka 1 tarik u Nohprah la pynlong da ka Meghalaya Boxing Association ha ryngkat ka Boxing Federation of India bad ia kaba la kyrshan lang da ka Tnat Sports and Youth Affairs jong ka Sorkar Jylla.

Ha kane ka sngi kaba ar jong ka jingialehkai la lah ban pynlong haduh 78 tylli ki bouts bad ki rangiakura na kylleng ka ri ki la khmih lynti ban ialehkai bha na ka bynta ban jam sha kawei pat ka wat jingiakhun bad ruh ban ioh khur takma.

Ha kane ka rynsan iakura la wan iashim bynta da ki khlur iakura ba pawkhmat jong ka ri kaba kynthup ia u rangiakura uba la khur ia ka takma ksiar ha ka South Asian Games u Sachin na Services uba la iakhun pyrshah ia u Vishal Kumar uba na Punjab ha ka 54-57kg featherweight bad u la lah ban khur ia ka jingjop da kaba tam point.

U rangiakura uba la khur ia ka takma rupa ha ka Asian Championship 2019 u Ashish Kumar na Himachal Pradesh u la iakhun pyrshah ia u rangiakura na Manipur u Kingson ha ka featherweight. Hapdeng kane ka jingiakhun kaba iakhaid bha u Kumar u la lah ban khur ia ka jingjop.

Kiwei pat ki rangiakura ka Jylla (Meghalaya) kiba kynthup ia u Kordor Marwein ha ka lightweight 57-60kg, u la shah rem ha u Aditya Nagar na Uttar Pradesh hadien ba u rephri u la hap ban pynsangeh noh ia ka jingiakhun ha ka wat kaba nyngkong. Kane ka jingpynsangeh ka la wan hadien ba u Kordor u la shah kura tyngeh ha utei u rangiakura uba na UP.

Katba ha ka 48-51kg flyweight, u Khrawbok Marwein u la iakhun pyrshah ia u rangiakura uba na Bihar u Shiv Kant. Watla u la shah kura bad khyllem ha madan, hynrei u la pyrshang katba lah ban iakhun tyngeh bad ha kaba kut u la shah rem noh hadien ba u la shah tam point ha utei u rangiakura uba na Bihar.