U Bah Deimaia L Siangshai u President bathymmai ka Shillong Press Club

Syllad | The Rising MeghalayaJuly 6, 2024

U Bah Deimaia L Siangshai uba dei u Editor ka kot khubor Mawphor ula shah jied kum u President ba thymmai ka Shillong Press Club (SPC) lyngba ka ilekshon ba la pynlong ha ka 5 tarik Naitung, kata hadien 14 snem kynthih.

Ha kane ka ilekshon u Bah Siangshai u la lah ban pynrem noh ia u Bah Joe Thangkhiew uba dei na Batesi TV da kaba ioh 91 vote bad shah jied ban mih bujli ha ka jaka jong u president barim u Bah David O Laitphlang.

Ha kane ka ilekshon ba la pynlong da ka Tnat Directorate of Information & Public Relation la sakhi halor ka jingwan iashim bynta shitrhem da ki nongthoh khubor ba ki bynta bapher bapher ka Jylla.

Baroh ki don haduh 164 ngut ki nongthoh khubor bad dkhot ka SPC kiba la wan iashim bynta ha kane ka ilekshon ha kaba u Bah Joe Thangkhiew u la ioh 67 vote katba u Bah Raphael Warjri na ka Media Plus u la ioh tang 6 vote.

U Bah Dominic Savio Diengdoh na ka  T7 News u la jop suk khlem da don ki ban ia aireng kum u General Secretary ka SPC, katba u Bah Gershome Hat uba dei u Editor ka kotkhubor Peitngor u la shah jied kum u Treasurer hadien ba u la ioh haduh 113 vote da kaba pynrem noh ia u Bah Martin Nongkhlaw uba la ioh tang 50 vote.

Ha ka jingkren u president bathymmai ka SPC u la ai khublei ia baroh ki dkhot kiba la shaniah ha u ban shimti ia kane ka kam. U la ong ruh ba u kyrmen skhem ba da ka jingkyrshan bad ka jingiatreilang jng baroh yn lah ban pyniaid shakhmat bad pynkhlain ia ki jingtreikam jong ka Club hapoh ka Jylla.