U Bah HS Shylla u dei u briew ba kren iaka hok ngin buddien ia ki ishu kiba ula ieh shadien ong ka HYC

Syllad | The Rising MeghalayaAugust 7, 2020

Ka Hynniewtrep Youth Council (HYC) haba phah iaka khubor sngewlem sha kiba haiing hasem jong u Bah HS Shylla uba la khlad noh na kane ka pyrthei haka sngi Thohdieng kala ong ba ka jingkhlad jong u kadei ka jingduh kaba khraw iaka jylla namar ba u dei u briew uba kren bad iaka hok bad nud ban mih shakhmat ban iakhun ia kano kano ka ishu jong jaidbynriew.

“Ngi dap da ka jingkyndit bad sngewsih ban tip shaphang ka jingkhlad noh jong u Bahdeng HS Shylla, uwei na ki nongialam ba shlur jong ka bri u Hynniewtrep. Ka jingkhlad u Bahdeng ka shisha ka jingduh kaba khraw ia ka Jaidbynriew Hynniewtrep hi baroh kawei,” ong u Bah Robertjune Kharjahrin, president, HYC.

“U Bahdeng Shylla u dei rangbah uba don ia ka jingtip ba janai, ka jingnang bad ka jingnud. U long u ba shemphang, uba treishitom bad uba nud ban kren ia ka hok bad ka jingshisha. U dei u nongiasaid jong ka jaidbynriew hynniewtrep naduh ka por ba u long kum u nongialam sengbhalang bad u la sah ha iing byndi na bynta ka jaidbynriew da ki phew phew sien.

Kum u nongialam ha ka saiñ hima sima, u long uba shlur bad wei u la shim ia kano kano ka ishu u iakhun naduh ka mynsiem bad da ba bor bad jinglah baroh.

Ka jingangud jong u Bahdeng ban ioh ia ka ILP, ban pyrkhing iaka shongkha khleh, ban pynbeit ia u pud u sam bad ban iada bad pynkhlain ia ki dorbar trai ri khamtam ia ki dorbar kur ki long kiba shongnia bad kum ka seng ngin bteng ban buddien bad ban iakhun halor kine ki ishu,” ong shuh shuh u Robertjune

U Roykupar Synrem, general secretary, HYC ula ong “Wat hapdeng ka jingban jong ka jingshitom, ngi iohi ba ka mynsiem shitrhem  jong u na ka bynta ka Jaidbynriew kam lip ne sangeh. Lyngba ka kynhun whatsapp group “Ka Sur u Paidbah ka Bri u Hynniewtrep” u la iakhun ban teh lakam ia ka jingpur sted u COVID-19 bad ban iarap ia kiba mad jingeh ha ka lockdown na kadaw ka khlam Corona virus.”

Ka HYC ka phah iaka khubor sngewlem sha baroh kiba ha iing ha sem bad kiba ieid ba thoin baroh jong u Bah Shylla bad buh ruh ka jingduwai ha U Blei ba don bor baroh ba un pyntngen ia ki hapdeng kane ka jingkahdum u lyoh.