U Bah Sanbor ruh u dei u Pnar, ong U Bah Hek haba pan jingkyrshan
KHANDULI: Ka Sorkar Jylla kala iasoi soskular bad ka Sorkar Kmie ban shna iaka State of the Art Diagnostic Centre kaba shondur T.20 klur tyngka ha Pasteur Institute, Lawmali ha Nongbah Shillong, iathuh u Myntri ka tnat ka Koit ka Khiah U Bah Alexander Hek.
U la iathuh ia kane ha ka jingialang paidbah kaba la pynlong ha Iew Khanduli haka sngi Balang na bynta ban pan ia ka jingkyrshan ia u Kyrtong jong ka Bharatiya Janata Party (BJP) u Bah Sanbor Shullai.
![](https://www.syllad.com/wp-content/uploads/2024/09/JIT-Vacancy-823x1024.avif)
U Bah Hek u la iathuh shuh shuh ba ha katei ka Diagnostic Centre ki nongpang ki la ban leit ia ki eskamin kum ka MRI, ka CT Scan, ka Ultra Sound, ka X Ray ryngkat bad ki test snam kiba pher bapher khlem da hap siew pisa.
U la iathuh ba ka Sorkar Kmie ha ka jingialam jong u Narendra Modi kum u Prime Minister ka la pynmih ia ka skim Ayushman kaba ai T5 lak tyngka kaba dei ka health insurance ia man u wei pa uwei u nongshong shnong ka Ri India.
U Bah Hek u la ong ka jingsynshar jong ka BJP ha ka por jong u Atal Behari Vajpayee u la wanrah shibun ki jingmyntoi na bynta ka thain ka Shatei Lammihngi da kaba seng ia Ministry of Development for North Eastern Region haba man la ki Ministry jong ka Sorkar Kmie ki hap ban ai shiphew percent na ka bynta ka thain shatei lammihngi.
U la ong shuh shuh ba ka Sorkar BJP ka la pyndep ban shna bad ban pyntreikam ia ka NEIGRIHMS, Shillong ia kaba ka Sorkar Congress ka la shu ieh khunswet da ki phew snem bad ka NEIGRIHMS mynta ka la kylla long ka jingkyrkhu kaba khraw ia ki paidbah.
Haba phai sha u Kyrtong jong ka BJP, U Bah Hek u la ong u Bah Sanbor ruh u dei u Pnar hi bad u la long u MLA jong ka Shillong South la lai sien mynta bad u la ju long ruh u MDC ka Laban Mawprem Constituency la san sien kynthih bad u long u briew uba la ih bad tbit bha ha ka lain sain hima sima.
U la kyntu ia ki paidbah ba ki dei ban jied ia u Bah Sanbor kum u MP namar u don ha ka party kaban sa synshar ia ka Ri India namar u thikna ba ka BJP kan jop kput biang ha kane ka elekshon MP.
U Secretary Shnong barim jong ka Shnong Khanduli U Bah Iaraplang Dkhar u la ud la nam ia ka jingeh jong ki paidbah kiba shong ba sah ha ki thain khappud bad ula kyrpad ia u Myntri ka oit ka Khiah ban phai khmat sha ka Khanduli.
Ha kane ka jingialang la iadonlang u Ma Chaphrang Lyngdon, District BJP President uba pyniaid iaka jingialang, Kong Anita Susngi, State Mahila President BJP bad kiwei kiwei ki nongialam bad dkhot ka BJP jong ka West Jaiñtia Hills.
Leave a Reply